«Доля церкви на Лемковині» – выклад Даміяна Новака в Рускій Бурсі

Неодолга в Рускій Бурсі в Ґорлицях історик і реґіоналиста Даміян Новак выголосит популярнонауковый выклад на тему долі церкви на Лемковині. Прелекция одбуде ся в четвер 17. липця/юлия 2025 р. о 18.00 годині.

Выклад посвяченый буде анализі культурных і архітектонных явиск, што детермінували еволюцию церковного будівництва на обшыри Лемковины.

На основі парунадцетьох выбраных примірів сакральных обєктів омовлены будут ріжнорідны тенденциі – од формотворчых i трансформацийных процесів кінця ХІХ ст. аж по деструкцийны діяня другой половины столітя. Прелеґент зосередит ся предовшыткым на явисках змін культурного краєвиду, якы в тым часі проходили – што обнимали розбераня церкви, як тіж адаптациі (ци консерваторскы аранжациі), часто мотивуваны соспільныма, ідеолоґічныма і адміністрацийныма факторами.

Наррация вкаже церкви не лем як творы архітектуры, але і як носителів памяти і доказы вельоверствовых історичных процесів, та як обєкты, котры фунґували на стыку політикы, локальной достоменности і консерваторской практикы.

Выклад ілюструваный буде богатым візуальным материялом, котрый вкаже зміны архітектонных форм, а тіж змінніст іх культурного контексту.

Прелеґент Даміян Новак то знаный в реґіоні музейник, історик і реґіоналиста. Адюнкт в Музею Бічской Землі в Бічы. Занимат ся реґіональном історийом, історийом Ґалициі та історийом архітектуры (головно церковной). Єст автором парудесятьох публикаций: моноґрафіі, дописів ци архітектонно-історичных нарисів.

Єст спілосновательом і реализатором Архіву Руской Бурсы – діґітального архіву, на котрый складат ся пару колекций архівалий, што тыкают памяток і культурного краєвиду полуднього-східньой Польщы з єй материяльном спадковином. Волонтер Стоваришыня «Руска Бурса» в Ґорлицях, а ведучый Стоваришыня Товариство Опікы над Памятками Ґорлицкого Повіту.