Томаш Квока здобыл ступін габілітуваного доктора

Перед двома місяцями Рада Дисципліны Языкознавство Ягайлоньского Університету єдноголосно підняла рішыня надати др. Томашови Квоці ступін габілітуваного доктора в обшыри гуманістичных наук в дисципліні языкознавство. Ґратулюєме!

Тото престіжне рішыня єст выразом узнаня для выдатных науковых осягнінь Томаша Квокы, його вкладу в розвиток языкознавчых бадань і заанґажуваня в популяризацию наук. Габілітацийный процес обнимал оціну наукового доробку кандидата, в тым його публикаций, бадавчых проєктів та участи в медженародных конференциях.

Наукова стежка др. габ. Томаша Квокы

Др габ. Томаш Квока єст абсольвентом сербской філолоґіі Ягайлоньского Університету, де в 2004 році зачал докторскы студиі під опіком проф. Вєслава Борися. Його докторска робота, оборонена в 2009 році, тыкала істориі словництва з обшыри соспільных односин в Сербіі і Чорногорі.

Од 2009 рока робит як адюнкт в Інституті Славяньской Філолоґіі Ягайлоньского Університету в Закладі Сербской Філолоґіі. Веде там баданя над семантиком і етимолоґійом полудньовославяньскых языків з особливым увзглядніньом сербского языка.

Єст членом Комісиі Культуры Славян Польской Академіі Знань та членом Комісиі Славянознавства Польской Академіі Наук в Кракові.

Науково занимат ся історийом і специфіком Войводины, языками меншын той обшыри та языковом політиком в Сербіі. Окрем того – історичном ґраматиком і історийом сербского языка, сучасным станом сербского языка та пост-сербско-хорватскых языків, народном і сучасном культуром Сербіі, популярном культуром в Сербіі.

Серед його заінтересувань сут і русиньскы языкы в Середній Европі ци лемківска/русиньска культура в Польщы і Войводині. Єст бо др габ. Томаш Квока Лемком з Ґорлиц, по родах з Ізб і Ліщын.

Заанґажуваня в захованя і розвиток лемківской культуры

Уж в молодости брал участ в неофіцийных занятях лемківского языка веденых вєдно з реліґійом орґанізуваных в Ґорлицях, де творила ся православна парохія, будувана была церков. Занятя реліґіі і языка для діти і молодежы, а тіж богослужыня для лемківской спільноты в Ґорлицях, одбывали ся в заступчым будинку, старій хыжы, при новобудуваній церкви. Занятя вюл нацийональный учытель парох поколінь Лемків і сучасный будитель – Петро Трохановскій, якій анґажувал молодіж в авторскы театрально-музичны видовиска, в котрых так само активну участ брал Томаш Квока. Представліня тыкали історичных тем звязаных зо спадковином Лемків, вказуваны были лемківскій спільноті при нагоді пропамятных стріч і церковных торжеств. Видовиска мали влияня на культурну свідоміст так публикы, як і самых выступуючых.

Заінтересуваня лемківскым языком продолжало в роках дальшой науковой і позанауковой карєры др. габ. Томаша Квокы. Як коректор текстів спілпрацує з выдавництвом Лемко-Тавер (при выдавничій сериі Ґолем, в рамках котрой печатаны сут тлумачыня на лемківскій язык світовой клясикы і інчых літературных творів, м.ін. «Звіряча фарма» Джорджа Орвеля, «Бомбель» Мирослава Нагача, авторства брата Т. Квокы – Петра Криницкого) ци з Фундацийом Стара Дорога, яка печатат едукацийный часопис для діти «Лемколянд».

Як редактор робит при печатаню книжок посвяченых лемківскій культурі реализуваных через Выдавництво Жызновскій напр. «Лемківскы приповідкы і приказкы зо Святковы Великой і околиц» ци «Лемківскы співанкы зо Святковы Великой. Співник».

Долгы рокы Томаш Квока вюл тіж занятя в Інституті Неофілолоґіі Педаґоґічного Університету в Кракові на напрямі/специяльности росийска філолоґія з русиньско-лемківскым языком.

Єст автором вельох книжковых публикаций, десяток науковых і популярно-науковых дописів, тлумачынь, м.ін. є спілавтором публикациі «Бесідуйме по лемківскы» ци Х і ХІ томів «Праславяньского словника». В 2023 році опубликувал книжку пн. «Войводина і єй Русины. О языку, культурі і істориі войводиньскых Русинів», котра є обшырным і ретельным компендиюм о бачваньскых Русинах.

Полный спис публикаций найдете за тым мотузком.

Сердечні ґратулюєме Томашови Квоці ступени доктора габілітуваного і желаме дальшых успіхів в професийній обшыри. Дальшы крокы науковой роботы певністю причынят ся до пошыріня доробку Ягайлоньского Університету, польского языкознавства та захованя лемківской спадковины.