Енді Варголь в Кракові

Коло 100 робіт Енді Варголя (1928-1987) мож обзерати на часовій выставі в Малопольскым Центрі Наукы Коґітон в Кракові. Презентуваны експонаты походят з єдиного в Европі (а єдного з двох на світі) Музею Енді Варголя в Меджелябірцях.

Директор Коґітону Казімєж Копровскій поінформувал на пресконференциі, же на выставі «Енді Варголь. Діалоґ з поп-артом», окрем образів, презентуваны сут і одручны ескізы, книжкы, облечыня і інчы артефакты артисты, а тіж фотоґрафіі авторства Білі Нейма і Рудa Прекопа. Разом то близко 150 експонатів. Векшіст не была скорше презентувана в Польщы.

Окрем робіт памяток, котры походят зо словацкого музею, на експозициі презентуваны сут тіж артефакты з приватных колекций. Серед них коло 30 окладинок вінильовых платен запроєктуваных Варгольом з колекциі музичного журналисты Піотра Метза.

Гости выставы при вході витат фіґура Енді Варголя, зроблена в скали 1:1, так як сой колиси сам желал.

«Выстава єст формом діалоґу, котрый Варголь піднял з культуром Америкы ІІ пол. ХХ ст. Як послідовник Марселя Дюшана, котрый, як і він, мал влияня на розшыріня границ штукы о реді-мейды, значыт готовы предметы, роблячы штуку інтелектуальным выкликом, а не річами до подивляня, ввюл в єй простір річы штоденного хосну» – подає орґанізатор.

Подля кураторкы выставы Барбары Возняк, краківска експозиция окрем артистичного контексту має тіж науковый аспект. «В звязку з тым, што находиме ся в Малопольскым Центрі Наукы Коґітон, вельо діянь буде про тото, жебы напр. вказати, в якых техніках робил артиста, як контестувала ся барва в його серіґрафіках, як його творчіст влият на сучасну культуру і науку» – повіла.

Науковый зміст был зрыхтуваный во спілпрацы з Академійом Красных Штук ім. Яна Матейкы і Музичном Академійом в Кракові. Вєдно з выставом зрыхтувано проґрам додатковых подій, котрый обнимат м.ін. промітаня фільмів авторства Е. Варголя ци плястичны варштаты інспіруваны його творчістю, радийовы проґрамы і концерты.

Кураторами выставы сут іщы Мартін Цубяк, директор Музею Енді Варголя в Меджелабірцях, Михал Быцько – спілоснователь лабірского музею та Іво Вахович з Коґітону.

Выстава «Енді Варголь. Діалоґ з поп-артом» буде доступна до 29. серпня/авґуста 2025 р. в Малопольскым Центрі Наукы Коґітон.