«Eнді Варголь в моім селі» – плястичный конкурс для діти

Стоваришыня «Руска Бурса» в Ґорлицях запрашат до участи в плястичным конкурсі пн. «Eнді Варголь в моім селі». До выграня цінны нагороды!

Іде о зробліня (свобідном техніком) плястичных робіт, котры будут інспіруваны творчістю Енді Варголя. Малюнкы можут представляти сценкы зо штоденного жытя мешканців села, іх роботу, звыкы, ілюструвати архітектуру села ци краєвиды, представляти жытелів сел – портреты. Задачом є зробити іх в такій спосіб, як творил Варголь – попартово.

Може то быти інспірация звельократняня, хоснуваня жывых, міцных кольорів, контрастовых прінтів – як роботы Варголя з періоду його найвекшой популярности, а можут то быти деликатны рисункы, гейбы екісзы – як з початкового етапу творчости Варголя. Можут то тіж быти коляжы, як коли Варголь спілпрацувал з Жаном Мішельом Баскія. Не треба ся ограничати – подібні, як не ограничал ся король поп-арту.

Роботы будут оцінюваны в трьох катеґориях:

• І катеґория – до 8 років,
• ІІ катеґория – од 9 до 11 років,
• ІІІ катеґория – од 12 до 14 років.

До выграня:

• І катеґория: 1. місце – чытник KINDLE, 2. місце – гра «Світ Експериментів», 3. місце –  гра «Але цирк»

• ІІ катеґория: 1. місце – чытник KINDLE, 2. місце – гра «Молодый хімік», 3. місце – гра «Кортекс»

• ІІІ катеґория: 1. місце – чытник KINDLE, 2. місце – гра «Такє жытя», 3. місце – гра «Діксіт»

Чытник KINDLE має дотыковый панель до чытаня велькости 6,8″ i 300 ППI, є водоодпорный, лучыт ся з wifi, має вбудувану памят велькости 8 ҐБ і єст «облеченый» в красну зелену, охоронну окладинку, што звекшат його безпеку вчас транспорту.

Роботы (велькости А4) просиме прислати до 30. вересня/септембра тр. на адрес: Stowarzyszenie «Ruska Bursa», ul. Sienkiewicza 28, 38-300 Gorlice. Кажду роботу просиме описати метричком: мено і назвиско дітины, вік, місцевіст (евентуальні назва школы) та доложыти згоду родича/опікуна на участ в конкурсі. Дрібницьовый реґулямін найдете за тым мотузком: Andy Warhol w mojej wsi – REGULAMIN i klauzula, зас згоду на участ дітины в конкурсі гев: Andy Warhol w mojej wsi – OSWIADCZENIE

Роботы будут пак презентуваны в будинку Руской Бурсы в Ґорлицях – вчас вернісажу пройде оголошыня лавреатів і вручыня нагорід (подія одбуде ся в терміні до кінця жолтня/октобра тр.)

Красні заохочаме взяти участ в конкурсі!