Епіфан Дровняк приізджат до Кжешовіц. Выстава в 130. річницю народин артисты

«Никыфор. Мастер наівной штукы» – то выстава, котра буде запрезентувана в Ґалериі Vauxhall. Орґанізує єй Центр Культуры і Спорту в Кжешовіцах. Вернісаж одбуде ся в середу, 21. мая 2025 рока в 130. річницю народин артисты.

«Выстава посвячена творчости Никыфора то ініциятива, котра роблена є, жебы приближыти шырокій публиці доробок єдного з найвыдатнійшых представників наівной штукы в Польщы i Европі. Експозиция презентує выбраны творы артисты, вказує його унікальный стиль, богатство тем та незвычайну вражливіст на світ» – інформує Центр Культуры і Спорту в Кжешовіцах.

Одкрытя выставы заплянуване єст докладні в ден народин Епіфана Дровняка – 21. мая. Никыфор жыл в роках 1895-1968. Початок вернісажу 18.00 год. Експозиция буде доступна для обзераючых до 16. червця/юнія. Вступне на выставу дармо.

Выстава посвячена творчости Никыфора «то не лем артистична гостина, але тіж нагода до рефлексиі над феноменом інтуіцийной штукы і значыньом культурной спадковины» – бесідує Ян Береза, директор ЦКіС. «Никыфор, якій творил в оддаліню од академіцкых кругів, лишыл по собі полны автентичности творы, представляючы м.ін. архітектуру, пейзажы і штоденніст з незвыклом уважністю».

«Сердечні просиме Вас до участи в вернісажы і обзерати выставу. Буде нам барз мило гостити Вас в Кжешовіцах вчас той особливой подіі» – запрашат ЦКіС.

Епіфан Дровняк то леґендарный артиста, самоук, якій вельо років был недоціненый. Лишыл по собі імпонуючу спадковину – тисячы рисунків, образів і ескізів, головні акварелів, котры днес захоплюют барвом, автентизмом і неповторном перспективом.

Творчіст Никыфора здобыла медженародне узнаня і днес уважана єст за єдно з найвыдатнійшых осягнінь наівной штукы в Европі.

Перша выстава Епіфана Дровняка, як «Яна Никыфора», одбыла ся в варшавскій сали Стоваришыня Польскых Архітектів. Неодолга пінзійше творчіст артисты была запрезентувана поза границями Польщы – перше в престіжній парижскій ґалериі Діны Вєрны, а пак м.ін. в Stedelijk Museum в Амстердамі, Бруксели, Льєж, Гайфі. В Німцьох його роботы мож было обзерати на трьох великых выставах в Баден-Баден, Франкфурті над Меном, Ганновері. Роботы Никыфора трафили за океан – презентувано іх м.ін. в Ґалериі Peter and Еlizabeth C. Tower в Ню Йорку, в Польскым Музею в Шікаґо ци в Meyer Library в Спрінґфільд.

«Выстава в Кжешовіцах позвалят пізріти на Никыфора не лем як аристу, але тіж як чловека – особу з великом детермінацийом, сильным почутьом достоменности і вынятковом вражливістю на світ. Презентуваны роботы і материялы приближают выняткову штоденніст, одданя малюваню, а тіж дорогу до узнаня, котра была долга і нелегка» – пише орґанізатор выставы.