Епіфан Дровняк в Ліґници

Од минулой пятниці (6. лютого/фебруара) в Музею Міди в Ліґници доступна є часова выстава творчости Епіфана Дровняка під назвом «Никыфор. Феномем самородного таланту». То першый раз коли Никыфор «пришол» до своіх краян – розсіяных по ліґницкым реґіоні.

Вернісаж притягнул вельо Ліґничан, в тым власти міста. Еспозиция представлят 50 творів, якы походят з колекциі Роберта Довгана. «Приємно было Вас видіти на тій вынятковій подіі. Фреквенция перевершыла нашы припущыня» – інформує Музей Міди.

В пятницьовым вернісажы окрем інчых взяли участ локальны самоурядовці і політикы – президент Ліґници Мацєй Купай, бывшый секретар стану в Міністерстві Державных Активів Роберт Кропівніцкій та Ярослав Равченко, віцемаршальок нижньошлеского воєвідства. Не бракло і двох осіб, завдякы котрым выстава была можлива – Роберта Довгана і Павла Карлика. Як раз з архіву Карликa і його жены Анны Бороды – Каролик походят представляны фотоґрафіі – з жытя, штоденности і творчой пути Епіфана Дровняка – Никыфора.

Творы, што завісли на стінах ліґницкого музею, переносят головно до меджевоєнного періоду Никыфора, якій ціненый є за найліпшый етап в його творчости. То краєвиды Лемковины, представліня рідной Крениці, автопортреты, візиі середин храмів і хыж.

«Вынятковым довершыньом вернісажу была музика в чудовым выконаню вокальной ґрупы Лемківского Ансамблю Пісні і Танця Кычера. Полны емоций традицийны лемківскы пісні та коляды, а тіж ориґінальны кроі, додали подіі автентичности і дозволили полнійше почути культуры, в котрій дорастал Никыфор» – подає Музей.

Експозиция была скорше вказувана в Музею Любушской Землі в Зеленій Горі та в Центрі Творчого Діяня в Любіні при нагоді циклю подій «Лемкы в Центрі». Ліґницка выстава буде доступна до 30. мая 2026 р. Кураторком є Барбара Пєтрас, кєрівничка Ділу Штукы Музею Міди в Ліґници.