Еврокомісарька Кос: Комісія буде слідовати діалоґ україньской влады з меншынами, включно Русинів

27-го октобра 2025-го року членове Рады влады СР про народностны меншыны за русиньску народностну меншыну Мартін Караш, Петро Медвідь і Мілан Ян Піліп звернули ся писмом до предсидателькы Европской комісії Урсулы фон дер Леєн.

Реаґовали тым на навщіву еврокомісарькы про розшыріня Марты Кос на Україні. Еврокомісарька навщівила і Ужгород, де стрітила ся із представителями народностных меншын. Почас той навщівы акцентовала намагы Україны при повніню в области меншыновых прав, і означіла тоту область за сповнену домашню задачу. Представителі Русинів запрошіня не дістали.

Членове Рады влады СР про народностны меншыны предсидательці Европской комісії пояснили сітуацію Русинів на Україні і підкреслили, же выхабліня русиньской комуніты із офіціалного їднаня о правах народностных меншын явить ся як свідома іґнорація їх існованя і оправданых пожадавок. Такый поступ нелем не оддзеркалює прінціпы рівности меншын, котры суть фундаментом цінностей Европской унії, але посылать то і неправилный сіґнал о неєднакім приступі ку народам, котры довгодобо жыють в просторі середньой Европы.

Предсидателька еврокомісії повірила одповідьов Марту Кос, котра своє писмо представителям Русинів загнала 3-го децембра. Еврокомісарька подяковала за представліня сітуації Русинів на Україні, што їй дало „далшу важну перспектіву“.

Еврокомісарька підкреслила, же права особ, котры належать ку народностным меншынам, суть основныма цінностями Европской унії, і суть частьов Копенгаґеньскых крітерій про приступліня. „Тоты права суть ясно встановлены в Рамковім договорі о охрані народностных меншын і в Европскій харті реґіоналных або меншыновых языків. Обидва ратіфіковала Україна, і зато творять фундамент прав особ, котры належать ку народностным меншынам,“ написала еврокомісарька.

Марта Кос припомянула, же ЕУ в рамках выїднаваня о членстві пожадала Україну, жебы выпрацовала Акчный план про народностны меншыны, котрый быв приятый 14-го мая 2025-го року.

„Комісія буде і далше слідовати выконованя акчного плану україньсков владов, і їй публічнов справов на вшыткых уровнях, як і проходячій діалоґ влады із представителями особ, котры належать ку народностным меншынам, включно представителів Русинів, і в припаді потребы зверне увагу україньской влады на недостаточну реалізацію европскых штандардів.“