Фестіваль Культур Погранича «Карпатскы Климаты» в Коросні – уж в найблизший вікенд

На Старым Рынку в Коросні в найблизший вікенд 19.-21. серпня/авґуста буде проходил Фестіваль Культур Погранича «Карпатскы Климаты». То подія, в рамках котрой находиме вельо вымірів культуры і штукы, а зрыхтуваний орґанізаторами проґрам обнимат выступы і презентациі ріжнорідных артистів, творців і музыків та товаришучы акциі і атракциі.

Обшырна оферта орґанізаторів «Карпатскых Климатів» то:

• IX Медженародне Бієнале Артистичного Леняного Полотна пн. З кросона до Коросна, на якым того рока запрезентуваных буде більше як 100 леняых робіт, выробленых артистами цілого світа,
• місце для діти на специяльні для них приготовленых рукодільных варштатах,
• фестіваль мадярскых вин,
• шторічний конкурс на традицийну наливку,
• пленерова експозиция выробів зо шкла враз з варштатами,
• Свято Хліба – показы і конкурс печыня найсмачнійшого хліба,
• ярмак рукодільных выробів, артистичного ремесла і реґіонального ідла,
• фотоґрафічний пленер і выстава,
• змаганя в літаню,
• тематичны прелекциі.

Обшырном частю Фестівалю Культур Погранича «Карпатскы Климаты» сут музычны концерты. Того рока тіж, подібні як влони, выступлят артисты, котры мают в своім репертуарі русиньскы пісні: знаний од років ансамбль Черемшына з Підляша та ґрупа А Де То Давнійше Строіло, з двома сестрами Лемкынями, як вокалістками.

Окрем них запрезентуют ся іщы м.ін. Капеля Ганкі Вуйцяк, Цімбальова Музыка Вінар, Русичі, Говерля, Аня Брода ци Тугай-Бей.