Фотоґрафічний конкурс «Карпатскій рік 2017»

Стоваришыня Рес Карпатіка оголосило фотоґрафічний конкурс для любителів Карпат пн. «Карпатскій рік 2017».

Охочы взяти участ в конкурсі можут переслати на майльовий адрес стоваришыня poczta@rescarpathica.pl максимальні 3 фотоґрафіі зроблены в 2017 р., што ся тыкают карпатской темы. Кажда знимка мусит быти описана – потрібна є інформация, што передставлят. Автор мусит мати до знимкы ничым неограничены авторскы права. Формат фотоґрафіі свобідний. Робота може быти кольорова або чорно-біла. Участником конкурсу може быти каждий, хто скінчыл 18 років.

Конкурсова комісия встановлена Рес Карпатіком выбере 5 фінальных знимок, на котры пак буде мож голосувати на фейсбуку – выграт фотоґрафія, яка отримат найвеце ляйків. Нагородом про выграного буде путівник по Ґорґанах з автоґрафом автора – Дариюша Дильонґа. Можливы сут тіж несподіванкы.

Знимкы мож слати до 24. січня/януара 2018 р. Голосуваня на ґамбокнижці буде оголошене до 29. січня/януара 2018 р. і тырвало буде до 10. лютого/фебруара 2018 р.