«Гіст в ЛЕМ.фм: Богдан Карел і Петро Криницкій – Мастер і Ученик» – пятниця, 11.30 год.

О двох такых, што в послідніх місяцях годинами добают в дереві. Єден з них єст уж експертом сницаракы, хоц як сам підкрислят – єст самоуком і до вшыткого дошол през практику, другій – на разі ся вчыт, але не сут то першы його пробы в плястичных штуках. В тым дуеті Богдан Карел выступує як учытель, Петро Криницкій як школяр, а предметом вчыня є різба в дереві. Не в ліщыні, але в Ліщынах. Награли сме іх добаня. Послухайте.

Были сме гын і провірили, як ім іде реализация стипендияльного проґраму «Мастер і ученик» Державного Інституту Культуры і Спадковины Села. В марци того рока вказало ся, што спосеред 130 надосланых пропозиций до участи в проґрамі, серед 22 найліпшых (і то на высокоым, бо четвертым місци) нашло ся зголошыня Петра Криницкого. Захотіл він навчыти ся різбити в дереві під оком інструктора – Богдана Карела, узнаного, не лем в нашым середовиску, мастера сницаркы. Конкурсовій комісиі думка ся сподабала і стипендия была признана.

Послухайте, як выглядат процес робліня діаконьскых двери і ци даст ся тото выконати в вісем місяців. А тіж – чом найліпшы липы роснут на цмонтери… а не лем того – премєра репортажу в пятницю, 20. жолтня/окторба 2023 р., о 11.30 год., повторіня: в суботу 21. жолтня/окторба 2023 р. о 19.00 год. і в понедільок 23. жолтня/окторба о 21.30 год.