«Голосы Русинів Підкарпатя» – середа, 18.10 год.

Шоровый герой «Голосів Русинів Підкарпатя» – простый сілськый хлоп із приселка села Лохова – Лінювців.

На днесь Лінювці суть частьов Лохова, але, як в старых часах, у народі то «окремішня републіка» зо свойов маленьков дзвоніцьов-церьковльов Ґеорґія Побідителя, храмовым святом на Юрія, діліньом на Лінювці Верьхні і Нижні, з автентічнов русиньсков бісідов, котру ту, збоку цівілізації, тяжко стратити.

Василь Щербан пів жывота прожыв у Мукачові, але гордить ся тым, же є Руснаком, любить свій народ, його бісіду, нашы традіції.

Од молодости занимав ся музиков і довгый час грав на бубні в капелі, котру у народі называли «Цигане», но тоты гудакы называли самы себе «Стєпєнь». Мали амбіції заграти на знамому втогды фестівалі «Червона рута». Але пришли мрачны 90-ты рокы, «Цигани» ся розпали. І музиканты пішли – каждый свойов путьов. Василь раз походив по заробітках, а потім крутив на танцях і свадьбах музику.

З дітинства вєдно з другыма лінювскыма дітми Василь бігав кажду суботу до церьковці-дзвониці, жебы поціловати хрестик. Втогды то было рітуалом. Із то і зачала ся любов до старых храмів, старовины обще. Він гордить ся, же якраз його бріґада при конзултаціях Михаіла Сирохмана рештавровала деревяну серенчівску (щасливецьку) Церьков Архангела Михаіла, яку на зачатку збудовали у селі Горонда у 1682-ім році, а до села Серенчівці єй Горондяне подаровали у 1733-ім році.

Має дяку Василь, кедь на то буде Божа воля, зробити то і у родных Лінювцях, де унікатны стары детайлы давно замінили бляха і пласт.

Слухайте «Голосы Русинів Підкарпатя» в середу 12-го фебруара 2025 р. о 18.10 год., або повторіня в четверь 13-го фебруара о 4.30 год. і в суботу 15-го фебруара р. о 11.00 год. за русиньскым часом.