«Голосы Русинів Підкарпатя» – середа, 18.10 год.

Мало меджі нами обстало ся людей, котры стояли при джерелах карпаторусиньского ренесанса. Тому стріча з такым як Олекса Дуда буде окремо ціннов.

Наш герой народив ся 26-го марца  1941-го року в селі Пилипци тогды Воловского округа. Закончів Філолоґічну факулту Ужгородьской державной універзіты. Перебрав ся жыти до Мукачова. Учітельовав, занимав ся шпортом. Фурт і всядыль быв у аванґарді.

Представляв Закарпатьску область на Всеукраїньскім зъїзді учітелів, а у 1988-ім році на  Всесоюзнім зъїзді  в Москві. Быв членом делеґації СССР на Олімпійскых грах у 1974-ім році  в Сараєві.

Коли зачав ся русиньскый рух, Олекса Дуда став єдным із основателів Общества підкарпатьскых Русинів, першым директором Русиньского народного дому в Мукачові. Пан Олекса бісідує о тій евфорії, з котров тогды, на концю 80-ых і зачатку 90-ых років у Мукачові і Ужгороді зберали великы мітінґы Карпаторусины, одвойовуючі  свої права.

Люде віровали, же в куртім часі наш народ признають, і будеме ся хосновати вшыткыма тыма правами, што ся нима хоснують другы народности. Зато і референдум 1991-го року, де было звіданя за самосправну теріторію, дав файну ціфру – 72,8 процента.

Пан Олекса быв делеґатом І. Світового конґресу Русинів у 1991-ім році в Меджілабірцях за Підкарпатя. Говорить, як СКР проходив, споминать Василя Турока-Гетеша, Павла Роберта Маґочія, і другых участників.

Єдным словом, ексклузівне інтервю з патріархом карпаторусиньского руху Олексом Дудом.

Слухайте «Голосы Русинів Підкарпатя» в середу 19-го марца 2025 р. о 18.10 год., або повторіня в четверь 20-го марца о 4.30 год. і в суботу 22-го марца р. о 11.00 год. за русиньскым часом.