«Голосы Русинів Підкарпатя» – середа, 18.10 год.

Днешня наша героїня Неля Лізанець цалком одрізнять ся од попередніх гостів «Голосів Русинів Підкарпатя». Она говорить бесідов, котров у краю кажуть лем у єднім селі – Извор-Гуті (на днесь «Родниковій Гуті»).

Тоты люде у 19-ім столітю переселили ся гев з Ліптовского Мікулаша. Зато і называли себе «ліптаками», а тутешні люде казали на них «лоптакы».

Правда, Неля ся народила на Діцковиці, котра днесь є частьов Поляны. Меджі тутешніма людми і жытелями другых сел округу не є ниякой особливой різниці. Але нянько Нелі – уродженый гутник, зато дівка не лем добрі освоїла собі бісіду предків, але і вернула ся на Извор-Гуту – оддала ся там.

Як то часто быває, точно Неля взяла на себе місію возродити традіції гутників, сохраняти бісіду, зберати фолклор. Зато, здравотна сестра за освітов, стала ведучов фолклорного колектіву «Гутницькі вечуркы». Родаци повірили Нелі і підпоровали єй у вшыткых  зачатках.