«Голосы Русинів Підкарпатя» – середа, 18.10 год.

Василь Чепак – єден з многых мукачовскых фатьовів, котрый выріс у вароші, де дякуючі пришлякам – совітьскым воякам, многы десятьлітя говорили по російскы многы. Але у тій сітуації не было єднобокости: дома у русиньскых родинах бісідовало ся по русиньскы, так і на уліці ся говорило у многых трафунках.

Василь з маленького чув дома нашу бісіду, слухав бабчины співанкы. Так його бабка не раз співала «Плине кача по тисині», «Під облачком». Послідня – то лемківска співанка, котра є свідчіньом того, же творчость Семана Мадзеляна, зохаблена Русинам, не сперла ся на Лемковині, а у совітьськы часы была познатов і на Підкарпатю. Музику до слов скомпоновав Ярослав Трохановскый.

На кінцю 90-ых років 20-го столітя Василь прикапчав ся до русиньского руху, і став брати участь на многых подія, і уже на зачатку 21-го столітя на многых етнофестувалах. У 2019-ім році Василь Чепак быв делеґатім XV. Світового конґресу Русинів в Старій Любовні, у 2021-ім році XVI. СКР в Криниці, у 2023-ім році XVII. СКР в Новім Саді.

Коли у 2022-ім році зачала ся война, Василь Чепак в першых днях пішов на фронт, служыв у 128-ім бріґаді, быв тяжко раненый. Война лишыла у сердці Чепака глубокый слід і три черепы, котры мусить носити тот Русин до кінця свойой земной пути.

Слухайте «Голосы Русинів Підкарпатя» в середу 14-го мая 2025 р. о 18.10 год., або повторіня в четверь 15-го мая о 4.30 год. і в суботу 17-го мая о 11.00 год. за русиньскым часом.