«Голосы Русинів Підкарпатя» – середа, 18.10 год.

Дітьскый примірный фолклорный ансамбель «Кирниченька» (ведуча Едіта Канчій-Токар) на Підкарпатю знають многы. Тот колектів жыє вже 44 рокы, приносячі радость зрітелям і слухачам.

І тот час Едіта Токар керує колектівом. Народила ся она у русиньскім селі Смологовиця в родині учітелів. З маленькой дуже любила співати, зато і пішла на музичне одділіня Мукачовского педаґоґічного учілища, де уйко по маминій линії – Василь Васииьович Бурч, быв директором.

По штудіях пішла вчіти музику до села Сілце, Іршавского района, а через три рокы перешла до Іршавской школы. Ту працовала 26 років.

У 1981-ім році основала колектів, котрый у 1982-ім році став «Криниченьков». Як каже сама пані Едіта: «Коли з кирниці воду черьпати, то туды прибывать нова: так ся мінявуть и діточкы в колективі».

За тот вшыток час колектів обвандровав цілый світ: быв трираз у Італії, трираз у Франції, Булгарії, Ґреції, Австрії. З концертами навщівила «Криниченька» і русиньскы общіны Румунії, Мадярьска, Словакії, Полщі, Сербії, Хорватії.

Гордостьов Едіты Васильовны є Ром Йосип Чава, котрый наднесь покоряє своїм талентом Німецько, і посылать зароблены концертами грошы на україньску армію.

Слухайте «Голосы Русинів Підкарпатя» в середу 11-го юна 2025 р. о 18.10 год., або повторіня в четверь 12-го юна о 4.30 год. і в суботу 14-го юна о 11.00 год. за русиньскым часом.