«Голосы Русинів Підкарпатя» – середа, 18.10 год.

Часто чуєме, же державны урядникы на Підкарпатю не можуть быти заанґажованы в русиньскім русі. То не є правдов. Арґументом тому може быти примір Едуарда Дуды, котрый помагав русиньскым общественным орґанізаціям як заступник головы і голова Мукачовской районной рады.

Теперь є на пензії. У 2015-ім році сам основав общественну орґанізацію «Русинськый край».  На звіданя, коли наш герой трафив до русиньского руху, Едуард Лукич повів: «Я єм гражданом Україны, але родив єм ся Русином, ним і єм од народжіня».

А народив ся Едуард Дуда в 1961-ім році в селі Пилипець, Міжгірьского (днесь – Хустьского) району, в родині учітелів. Пилипець – зачаток Мараморошской жупы. Нянько му, Лука Васильовіч, учів тілесну выхову в Пилипецькій середній школі, дакілко декад быв тренером зборной команды области із бігу на ліжах.

Особа отця притяговала до родины людей, котрых знав тогды Союз. Наприклад, у родины Дудів по дакілко днів быв у гостях козмонавт Ґеорґій Стрекалов, котрый приходив до села ся поліжовати.  Гостьовали у Лукы Дуды і знамы артісты а малярі.

Стрыко Едуарда Лукича – Олекса Дуда, быв єдным із зачінателів русиньского руху в Мукачові. Зато і розумієме, же маючі довкола себе своє, родне, наш герой і не міг быти іншакым. Родив ся Карпаторусином – по жывотнім пішнику Карпаторусином і ступать.

Слухайте «Голосы Русинів Підкарпатя» в середу 2-го юла 2025 р. о 18.10 год., або повторіня в четверь 3-го юла о 4.30 год. і в суботу 5-го юла о 11.00 год. за русиньскым часом.