«Голосы Русинів Підкарпатя» – середа, 18.10 год.

Із заслуженым працовником културы Україны Юрійом Глебом бісідовали сьме минувшу середу, і Юрій Федоровіч розповів, як за його участи Іршава стала културнов столицьов края.

Іщі пан Глеба поділив ся інформаційов, як 20-рочну скушеность ведучого Іршавского одділіня културы схосновав у области.

У днешнім проґрамі Юрій Федоровіч побісідує, як за його участи было выдано невеликым тіражом факсімілне выданя Королевского Євангелія 1401-го року. То была точна копія стародавного рукописа, котра вышла на честь 615-ой річніці його появліня. Підготовку до печатаня, котра ся вела пять років, вели учены Закарпатьского малярьского інштітуту.

На днесь Юрій Глеба є директором Мукачовского драматічного театру. Повный енерґії думать  одремонтовати театер, но і як сохранив із молодых років, грає у трьох пєсах. Юрій Федоровіч думать о тім, жебы русиньске слово звучало із сцены так як і україньске, бо втогды обидві културы лем ся збогатять.

Слухайте «Голосы Русинів Підкарпатя» в середу 13-го авґуста 2025 р. о 18.10 год., або повторіня в четверь 14-го авґуста о 4.30 год. і в суботу 16-го авґуста о 11.00 год. за русиньскым часом.