«Голосы Русинів Підкарпатя» – середа, 18.10 год.

Василь Фурдь – майстер сцены, лавреат Мукачовской містьской премії імени Александра Духновіча, Областной премії братів Шерегіїв. Але при тім наш герой лишыв ся простым верьховиньскым чоловіком із присілка села Ізкы – Матачів.

У далекых 60-ых роках любимыма занятями малого дітвака было мальовати і слухати радіовый проґрам «Театер перед мікрофоном». А коли вчів ся на Педаґоґічнім учілищу, навщіва Мукачовского драматічного театра розклала про нього жывотны акценты – став артістом. Грали тогды «Закарпатську легенду» Олега Малиньского.

Дднесь Василь Михайловіч є знамый артіста Україны, участник і ведучій многых русиньскых фестівалів. Оддав любимій роботі 44 рокы в Мукачовскім театрі, і рік з половинов перед тым в Чернівецькім театрі імени О. Кобиляньской. Любить свою землю, любить нашых людей, і має дяку зограти іщі головну роль свого жывота.

Слухайте «Голосы Русинів Підкарпатя» в середу 20-го авґуста 2025 р. о 18.10 год., або повторіня в четверь 21-го авґуста о 4.30 год. і в суботу 23-го авґуста о 11.00 год. за русиньскым часом.