«Голосы Русинів Підкарпатя» – середа, 18.10 год.

Леонід Балог є єдным з тых Карпаторусинів, котры стояли у джерел ІІІ. Русиньского ренесанса, але обще о них нихто не знав і не знає.

Они роками роблять свою роботу по воскресіню нашого народа, участвують у вшыткых політічных і културных акціях. Ани єдна подія не обходить ся без Леоніда і такых другых як він актівістів.

Погляд Леоніда на розвой русинства у краю є абсолутно обєктівный. Через його бісідованя слухачі Лем.фм можуть прослідити історію карпаторусиньского руху од зачатку до днесь, через прізму Мукачовской містьской орґанізації імени Александра Духновіча.

І днесь, коли Леонід de facto сам веде Мукачовске научно-културолоґічне общество імени Александра Духновіча, не журить ся, же у реґістраційных документах не є головов орґанізації.

«Главноє бы ся робота робила, а тко голова – се не є важным,» любить повторяти Леонід.

Слухайте «Голосы Русинів Підкарпатя» в середу 1-го октобра 2025 р. о 18.10 год., або повторіня в четверь 2-го октобра о 4.30 год. і в суботу 4-го октобра о 11.00 год. за русиньскым часом.