«Голосы Русинів Підкарпатя» – середа, 18.10 год.

Ярослав Штефко першый раз стрів ся мі на засіданю ­Свалявского общества підкарпатьскых Русинів і само собов, же ня зачудовав його вік – 17 років.

Стало мі чудно, же ровесникы му о танцях і дівках думають, а Славко ся зажурив свойов ідентічностьов? Молодый хлопець сидить по бібліотеках і музеях, много чітать і вже сам діґіталізує і кладе на інтернет творы русиньскых писателів. Приклад маєме з «Марусьов» Івана Сілвая. Дізнав єм ся, же до самоідентіфікації пришов Славко іщі чотыри рокы тому, коли зачав бавити компютеровы гры на русиньскім языку.

Як не чудно, але найвеце ня радує на тім леґіньови то, же він натілько пропитав ся духом русинства, же запалює огень любви до Отцюзнины у другых такых як сам. Справды, не сохташно, молодый – а вже Будитель.

Слухайте «Голосы Русинів Підкарпатя» в середу 8-го октобра 2025 р. о 18.10 год., або повторіня в четверь 9-го октобра о 4.30 год. і в суботу 11-го октобра о 11.00 год. за русиньскым часом.