«Голосы Русинів Підкарпатя» – середа, 18.10 год.

Радує то, же Русинами на Підкарпатю ідентіфікують ся не лем малярі і поеты, з котрыма сам Бог приказує і вказав їм, хто они суть. Карпаторусинами признають себе і тоты, што цілый жывот были керовниками у державных урядах.

Тоты люди, необзераючі ся ни на што, не одказали ся од свого народа. До такых мож однести і Йосифа Ганича.

Народив ся наш герой у робітній фамелії в Яслищах коло Перечина. 20 років робив на заводі «Стеатит». Ту, як голова профсоюза, Йосиф Федоровіч робив вшытко, абы Перечин мав свої гудацькы капелы, не гіршы од Закарпатьского народного хора.

В бісіді з теплотов споминать знамого русиньского активісту, директора Ужгородьского заводу експеременталного выбавліня Володиміра Біланина, котрый не раз їм помагав.

Коли на зачатку 90-х років 20-го стороча заводы і фабрикы ся заперали, Йосиф Федоровіч у 1992-ім році кандідовав на голову Перечина. На тій посаді робив дві каденції. За тот час зробив много. Меджі іншым розробив ерб Перечина, зачав День селища, написав краєписну книжку «Перечин».

Пузніше выдав іщі дакілько книжок вшелиякой тематікы, а послідня робота «Закарпатці бісідують/закарпатці бісідувуть» вышла дословно на днях.

Слухайте «Голосы Русинів Підкарпатя» в середу 5-го новембра 2025 р. о 18.10 год., або повторіня в четверь 6-го новембра о 4.30 год. і в суботу 8-го новембра о 11.00 год. за русиньскым часом.