«Голосы Русинів Підкарпатя» – середа, 18.10 год.

Знамый по цілім Підкарпатю свадьбляный староста Василь Маровді за іронійов долі першу свою свадьбу провів сорок років тому, коли женив днешнього свого керiвника – директора Керецьківского ліцея Василя Андрелу.

Але перешло іщі десять років, покля в 1996-ім році Василь Михайловіч провів уже свадьбу, за котру му заплатили. Пак тісяч весіль у 250-ох населеных пунктах Підкарпатя і 10-ох другых областях Україны. Тото назберало чотыри рокы недоспаных ночей.

Наш герой пояснює свій феномен тым, же репертоар дійств (то не лем свадьбы, а і юбілеї, корпоратівы ітд.), робив на народній русиньскій бісіді: вершах Павла Чучкы, Михаіла Чухрана, Василя Кузана. Зато го люди принимали і любили… та і дале люблять.

Свою многорічну скушеность Василь Михайловіч має дяку передати молодым старостам, описати у книжці «Порадник тамади: секрети старостівського мистецтва».

Слухайте «Голосы Русинів Підкарпатя» в середу 12-го новембра 2025 р. о 18.10 год., або повторіня в четверь 13-го новембра о 4.30 год. і в суботу 15-го новембра о 11.00 год. за русиньскым часом.