«Голосы Русинів Підкарпатя» – середа, 18.10 год.

Так як доцент Падяк є єдным з немногых знателів русиньской літературы, зато сьме рішыли побісідовати з ним і попросити го розповісти о зроджіню і екзістованю нашой літературы в Америці.

Бо емігранты із Старого світа в Новім світі не лем зарабляли грошы на навернутя домів. Правда, нихко з них не зберав ся обставати в Америці, а вшыткы думали лем про то, як серенчливо вернути ся до Карпат. Але жытя ся складало по другому. Зато Русины еміґранты в США отворяли школы і будовали церькви, основали клубы і общества. Дахто ся брав за белетрію. Так и родила ся нова русиньска література.

Новый світ дав нам фест славных імен, меджі котрыма требало бы выділити Еміла Кубека – ґрекокатолицького сященика, публіцісту, языкознателя, писателя. Найвекшов прозаічнов роботов Е. Кубека є роман «Марко Шолтыс», котрого дії ся одбывавуть на Маковіці од 70-ых років 19-го столітя аж до 1915-го року.

Пан Валерій повідать, як многы писателі Старого світа заганяли свої творы до Америкы, жебы там їх напечатали. І часто трафляло ся так, же дакотры творы Сілвая ці Ставровского-Попрадова суть лем в Штатах. Зато на днесь требало бы їх вернути до старой Отцюзнины.

Слухайте «Голосы Русинів Підкарпатя» в середу 10-го децембра 2025 р. о 18.10 год., або повторіня в четверь 11-го децембра о 4.30 год. і в суботу 13-го децембра о 11.00 год. за русиньскым часом.