«Голосы Русинів Підкарпатя» – середа, 18.10 год.

Премію «Pro Arte Ruthenorum», котра носить імя Івана Манайла, надає  Світовый конґрес Русинів (СКР) вєдно з Русиньскым націоналным самосправованьом міста Вац (Мадярьско). Премія за русиньске уменя заснована была на засіданю СКР 6-го юла 2019-го року.

Цільом заснованя є підпора і нагороджіня тых вызначных модерных русиньскых художників, якы лишыли глубокый слід у всокочіню, розвою і презентації світового русиньского уменя.

Першым лавреатом Премії імени Івана Манайла «Pro Arte Ruthenorum» у 2020-ім році став Володимір Микита –днесь вже покійный класік Підкарпатьской малярьской школы. А тот рік премія навернула ся на Підкарпатя.

Хоць о їй вручіню было оголошено іщі в літі на XVIII. СКР в Румунії, до лавреата она дішда лем теперь. Ним став Михаіл Белень – знамый в краю сохарь, ґрафік, медайлер, малярь. Михаіл Олексійовіч є членом Націоналного общества художників Україны од 1983-го року, а Націоналного общества журналістів Україны од 1996-го року. Лавреат дакілько престіжных премій (у тім чіслі і Олены Мондіч).

У 2002-ім році дустав званя «Заслуженый малярь Україны». Зато і маєме бісіду із тым великым сохарьом.

Слухайте «Голосы Русинів Підкарпатя» в середу 17-го децембра 2025 р. о 18.10 год., або повторіня в четверь 18-го децембра о 4.30 год. і в суботу 20-го децембра о 11.00 год. за русиньскым часом.