«Голосы Русинів Підкарпатя» – середа, 18.10 год.

Выбераючі далшого героя проґраму «Голосы Русинів Підкарпатя», глядав єм штось шпеціалне. Честую вшыткых нашых гостів, но хотіло мі ся, жебы на тот раз было штось незвычайне.

А іщі хотіло ся чути бісіду, котров нашы люди говорили 30 років назад, хоць бы лем дакус.

Зато коли мі мій цімбор Василь Щербан з Мукачовщіны запропоновав на тоту роль жену-столярьку з Бобовищ, та быв єм цалком зачудованый і обрадованый. А іщі коли-м учув їй бісіду, стало ясно, же-м стрітив то, што-м глядав.

Віталіна Ленюска – то справды дітина нашой землі, дітина Карпат. Она нияк ся не ганьбить за свою бісіду, і не видить в тім, же не знає добрі україньского языка (так як і векшына Підкарпатців го не знать) ниякой біды. «Кедь не розумієте по-нашому, я вам перекладу,» говорить ку тому ділу наш гость.

Віталіна Ленюска обожнює свою роботу, свою землю, і нашых людей.

Слухайте «Голосы Русинів Підкарпатя» в середу 4-го марца 2026 р. о 18.10 год., або повторіня в четверь 5-го марца о 4.30 год. і в суботу 7-го марца о 11.00 год. за русиньскым часом.