«Голосы Русинів Підкарпатя» – середа, 18.10 год.

У першій части проґраму «Голосы Русинів Підкарпатя» знаный вченый-історік Володимір Фенич розповість о своїй жытьовій пути, його пути до наукы.

Наш герой, котрый ся народив у простій робітній родині на Виноградовщіні (днесь Береговщіна), мав дяку на зачатку стати малярьом. Але із-за недостатку школованя в малярстві не зробив екзамен. Тверде рішіня быти історіком пришло у нашого гостя в старшій школі – то туга доказати насамперед собі, же мож добивати цілі.

Слухачі будуть чути історію штудентьскых років Володиміра Івановіча. Повідать, же до общественных рухів на зачатку 90-ых років 20-го столітя ставляв ся індіферентно. Хоць тогды много штудентів, його цімборів, і педаґоґів Ужгородьской державной універзіты (УжДУ) в тых дійствах участвовали.

При тому вже з днешньой позіції пан Фенич дає оцінку выборам, референдуму і вшыткым політічным процесам того часу.

З теплотов і добротов такой споминать перебываня в Ужгороді професора Івана Попа, роботу основаного ним у 1992-ім році Научно-бадательского інштітуту карпатознательства УжДУ.

Чути будуть слухачі і за другых учітелів – професорів Історічной факулты УжНУ – Томаша Собка, Володиміра Задорожного, Григорія Павленка ітд.

Слухайте «Голосы Русинів Підкарпатя» в середу 1-го апріля 2026 р. о 18.10 год., або повторіня в четверь 2-го апріля о 4.30 год. і в суботу 4-го апріля о 11.00 год. за русиньскым часом.