«Голосы Русинів Підкарпатя» – середа, 18.10 год.

Наш гость Євген Жупан – заслуженый доктор Україны, лідер найвекшой русиньской орґанізації на Підкарпатю – Народной рады Русинів Закарпатя.

Родив ся у селі Ракошино. То быв період Совітського союза і курз державы быв пряменый на русіфікацію, зато нелем по містах, але і в селах насаджовав ся російскый язык. Але вже тогды він од няня знав, же сьме Русинами, знав, што таке русиньскый язык.

Коли перед розпадом Совітського союза народностны меншыны зачали просити собі права, тогды,  у 1989-ім році, появило ся і Общество карпатьскых Русинів. Євген Євгеновіч став єдным з першых у шоры руснацькых актівістів. Од 2005-го року возглавив орґанізацію з назвов Народна рада Русинів Закарпатя.

Іщі в 1994-ім році Жупан став депутатом Закарпатьськой областной рады. Многы акції – зроблены за 25 років на хосен Карпаторусинів, суть його заслугов. Так, Орґанізація зъєдиненых народів у 2006-ім році передложыла нашій державі вызнати націоналность Русин. За його пропозіційов 7-го марца 2007-го року депутаты Закарпатьской областной рады на засіданю прияли рішеія вызнати націоналность Русин і внести єй до списку націоналностей краю, а 22-го децембра 2009-го року было голосованя за гімну Закарпатьской области «Подкарпатскіє русины оставте глубокій сон» ітд.

На днесь Євген Євгенович міцный і мудрый русиньскый дітьскый доктор за плечами котрого тісячі спасеных дітей, а так само карпаторусиньскый лідер, котрый навернув у бік свого народа многых Пудкарпатьців. І такых заслуг у нього стає все більше.

Слухайте «Голосы Русинів Підкарпатя» в середу 16-го октобра 2024 р. о 18.10 год., або повторіня в четверь 17-го октобра о 4.30 год. і в суботу 19-го октобра р. о 11.00 год. за русиньскым часом.