«Голосы Русинів Підкарпатя» – середа, 18.10 год.

Карпатьскы Русины фурт были міцныма вояками у стані другых армій. Славили ся тым, же суть без страху, суть честны, вірны.

Як приклад мож спомянмути Павла Кенеза із Салдобоша, котрый быв драбантом ці тілеснов ґардов при кральови Матяшови Корвінови. А особна тілесна ґарда Ференца Ракоція ІІ. раховала 700 вірных драбантів – Русинів. А і у самім куруцькім войску Карпаторусины проявили ся як перфектны воякы. Зато князь і назвав у мемоарах наш народ «найвірнішым народом».

Іщі мож  припомянути вояків Чехословацькой леґії часів Другой світовой войны, а так само підкарпатьскых вояків 128-ой бріґады і другых войск Збройных сил Україны в днешній войні.

Коли 24-го фебруара 2022-го року Росія напала на Україну і многы «патріоты» з набитыма грошами ташками наскоро втікали з державы, днешній герой нашого проґраму Станіслав Ганьковіч робив нарубы: вертав ся домів із заробітків на Мадярах, абы стати в оборону той державы, гражданом котрой є. Він вернув ся і такой вступив до теріторіалной обороны, по чім перешов служыти до ЗСУ, де є і доднесь.

Станіслав Ганьковіч – то єден із найактівнішых карпаторусиньскых актівістів, котрый пришов до руху у другій половині 90-ых років ХХ. столітя. Много років підпорує русиньскый рух фінанціями, помагать дітьскому фолклорному колектіву «Бабчина співаночка». Выконуючі заповідь Олгы Прокоп, за свої властны грошы выдав першу книжку приповідок на русиньскім языку «Казкы з телевізора», основав общественну орґанізацію «Наохтема в рокаши» і провів під тов назвов фестівал русиньской културы на мукачовскім замку «Паланок». Є членом «Русин-Клуба».

Стас вірить, же вшыткы карпаторусиньскі орґанізації світа соєдинять ся до єдного руху, котрый буде мати серенчу у обороні прав свого народа. Через тото і його кредо «Наохтема в рокаши».

Слухайте «Голосы Русинів Підкарпатя» в середу 13-го новембра 2024 р. о 18.10 год., або повторіня в четверь 14-го новембра о 4.30 год. і в суботу 16-го новембра р. о 11.00 год. за русиньскым часом.