«Говорить Пряшів» – пятниця, 18.10 год.

Милы слухачы, хоц ся уж змеркат, то заєдно ліпше ся нам жыє, кєд маме покус долшый ден, кєд ся нам він выдолжат з минуткы на минутку.

Діє ся так зато, бо яр лем жде, жебы задуркати до нашых двери. Хоц зима не єст таком, як бы сме си може єй вымрияли, то так ци інакше она годна іщы заатакувати. А мы просто ся єй не дайме, або ліпше – допасуйме ся до ней і бавме ся вєдно з ньом.

В «Говорить Пряшів» пропонуєме дальшы цікавы темы. Лем спомнийме на тоты вшыткы части, якы складают ся на наш проґрам. Найдеме гын культуру, історию, інформациі, язык ци музику. Вшытко тото, што любиме. Вшытко тото, што добрі знати і примємно слухати. Поздравляме пряшівску редакцию радия Русин.фм. Кєд лем скінчыт ся сес проклятый коронавірус, запрашаме до нас на Лемковину, штобы ся повеселити і поспівати тоты самы співаночкы. Товды запросиме і вас – каждого з вірных слухачів радия ЛЕМ.фм. Зробиме си великій пікнік на нашій прадідівскій земли – коло Руской Бурсы в Ґорлицях.