Град Любовня має зреконштруовану стіну і воєньскы касарні

Реконштрукція севоровыдной стіны граду Любовня і його III. і IV. двора є докінчена. По двох роках інтензівной роботы дочекали ся обновы і воєньскы касарні, котры обявили на граді по тім, як перед 15-ма роками впала стіна.

Як інформовала Леа Леготска із Одділіня комунікації Пряшівского самосправного краю, на інвестіції брали участь Міністерство културы Словацькой републікы, і зряджователь Любовняньского музея – Пряшівскый самосправный край. Ставбу колавдовали в понедільок 6-го септембра 2025-го року.

Днесь є град пыхов краю

Попри реконштрукції створив ся і новый простор про соколярів, такзваный сколярьскый двір. Почас робот археолоґове нашли дакілько цінных історічных артефактів, меджі нима горнці, мискы, погары, монеты, мосяжну ґомбічку із мундуру вояка ці брытву.

„За остатніх 20 років на граді зробив ся великый фалат роботы. Іщі не так давно быв град записаный як розвалина, теперь то пыха Пряшіского краю,“ повів Мілан Маєрьскый, председа Пряшівского самосправного краю.

„Вірю, же і тота остатня реконштрукція, котра одкрыла воєньскы касарні і множество археолоґічных артефактів, буде далшым тяглом про навщівників. Першу археолоґічну експозіцію артефактів із штоденного жывота вояка із 17-го столітя будуть годны видіти уж в слідуючій літній сезоні,“ продовжовав Маєрьскый.

Приступны будуть просторы по стовках років

Перша археолоґічна експозіція воєнськых касарень із 18-го столітя представить выбраты артефакты із археолоґічного баданя. Выстава буде мати і модерны інтерактівны елементы, навщівници ся дізнають веце о жывоті градного вояка, штоденных повинностях ґарнізону, значіню елементів обороны.

„Тов обновов граду комплетно закінчіла ся фортіфікація граду, і зробив ся цінный простор про новы експозіції і выставы під стріхов. Музей планує презентовати жывот воєньского ґарнізону граду, котрый мав у часі скрываня польскых коруновачных дорогоцінностей 250 мужів. Навщівникам будуть сприступнены части граду, котры были неприступны стовкы років,“ повів директор Любовняньского музея Далібор Микулик.

Северовыходна стіна была колись вызначнов обороннов лінійов граду в тяжко доступнім терені. Якраз тото положіня компліковало і роботы на реконштрукції. Вшыткы тоны каміня, котры были при реконштрукції схоснованы, робітници носили в руках. Реконштрукція почала в септембрі 2023-го року, закінчіли єй в авґусті 2025-го року.

Фото: Ян Салонь.