Грекокатолицка церков в Ліґници без креста. Прокуратура веде слідство. Затримано єдну особу

Не тихне справа варварской крадежы креста з головной бані грекокатолицкой церкви в Ліґници. До самой крадежы дішло в ночы з пятниці на суботу (12.-13. вересня/септембра).

Днес пополудни ліґницка поліция подала, што зімала єдну особу, яка підозрена є о зрізаня креста з церкви.

Округова Прокуратура в Ліґници 15. вересня/септембра в оприлюдненым комунікаті подала, што зачала слідство в справі образы реліґійных чувств вірных грекокатолицкой парохіі Успіня Пресвятой Богородиці в Ліґници.

О справі повідомил найперше парох о. Мирослав Драпала: «в навечеря праздника Воздвижыня Честного Креста незнаны люде зняли крест з головной бані нашой церкви та пошкодили дах.
То смутный ден для нашой парохіі, зневага Божого Храму та крестного знаменя. Важным єст зазначыти, што материял, з якого был выконаный крест, не был осболиво цінный і не принесе выконавцям материяльного хісну» – пише ся в тексті вказаным на сайті ліґницкой парохіі.

Фактично, інтересным є мотив, якій довюл до такого чыну. Сам крест, як уж спомнено горі, не приносит великой материяльной корысти. О тым, што інтенциі нензнаых осіб могли быти доцяп інчы, свідчыт тіж тото, што справці мусіли быти выквалифікуваны в тым, што зробили. На храм вошли по драбині, лишаючы сліды обутя на стінах, а пак, вбиваючы клины, знищыли дах і зрізали желізный крест.

До ліґницкой церкви прибыл голова грекокатолицкой Церкви

«Днес з рана страшна новина стрясла сумліня каждого християнина. Дознали сме ся, што той ночы в вашій парохіі был вчыненый великій гріх, гріх святотатства. З высоти центральной бані того храму злочынна рука зневажыла крест Господній» – бесідувал верховный архієпископ Кыєво-Галицкій, голова Украіньской Грекокатолицкой Церкви.

Як раз 13. вересня/септембра блаженнійшый Святослав перебывал в Польщы, так особисто в Ліґниции очелил вечернє богослужыня. Присутніст предстоятеля грекокатоликів в Польщы зышла ся з хіротонійом помічного владыкы вроцлавско-кошаліньской єпархіі, Мариюша Дмитерка, яка одбыла ся во вроцлавскій катедрі в суботу, 13. вересня/септембра.В молитві в ліґницкым храмі, окрем владыкы вроцлавско-кошаліньского Володимиря Ющака, взял участ римокатолицкій єпископ ліґницкій, Анджей Сємєвскій, якій вказал солідарніст з грекокатоликами, а при тым сопротивліня для нищыня креста Господнього

Вірны рахуют шкоду

Справа зрізаня креста в Ліґници резонувала і в політично-державных кругах. Своі заявы подали Міністерство Заграничных Справ Польской Республикы і Амбасадор Украіны в Польщы.

Як в комунікаті подає ліґницка прокуратура, повідомліня о переступстві зложыл парох. Знищыня выцінил на суму 40 тис. зл. 30 тис. то кошты повязаны зо знищыньом мідяной бляхы, а 10 тис. сам крест. В дах было вбитых 20 будівляных клинів. Крест мал выміры 2х2 м і важыл близко 20 кґ (скорше являла ся інформация, што мал важыти 100 кґ, але тоту підважат сама поліция, уж по затримаю підозреного). Зрізаный крест, уж на земли, был потятый на меньшы кавальці.

Грекокатолицка парохія в Ліґници істнує од 1957 р. Теперішній храм был вознесеный в 1998-2008 рр.

В віторок затримано єдну особу

Пополудньом в віторок явили ся першы інформациі, што поліция затримала єдну особу, яка підозрена є о крадіж крест з бані ліґницкой грекокатолицкой церкви.

Покля што не подано більше дрібниц. Прокуратура заповіла, што детальнійше выповіст ся на тоту тему заран, 17 вересня/септембра.

З поданых інформаций выходит, што справця крадежы міг быти сам. Найдено тіж фраґменты порізаного креста.

фот. www.cerkiew.net.pl