Гуменьска церьков на списку вызначных памяток

Жебы підпорити усвідомліня жытелів міста Гуменне о културных і природных памятках повязаных з його історійов і розвитком, вырішыла самосправа зробити евіденцію вынятковых памяток.

Список першых сім такых памяток схвалили містьскы депутаты на своїм децембровім засіданю. Інформовала о тім аґентура TASR.

Найстаршов памятков на нововыникнутім списку є бароково-класіцістічна Ґрекокатолицька церьков Успенія Пресвятой Богородіці. Правдоподовно тот храм дала выбудовати Марія Терезія.

Аж дві ґрекокатолицькы памяткы

Подля історічных документів тот храм мав быти на місці старшой деревяной церькви збудованый у 1767-ім році.

Но на южній стіні храму є табла з латиньскым текстом, в котрім ся пише: „На векшу славу Божу і на честь Блаженой Дівы Марії до неба взятой быв збудованый тот Божый дім почас діяня пароха найвсечестнішого пана Йоана Блажовского, ґреческого обряду вікарія Мукачівского єпіскопства, архідіякона земпліньского, в році Господа 1717.“

Храм быв од початку успеньскый. Перебудованый быв у 1875-ім році, на початку 20-го столітя завдякы грошам вызбераным од краянів у Америці зробив ся новый престол і іконостас.

В другій половині 1990-ых років проходила далша векша перебудова храму. В тім часі дістала церьков і розпис на стінах од вызначного академічного маляря Мікулаша Климчака, котрый творив іконы у своїм унікатнім штілі.

Калварія, яка находить ся в ареалі парохіалного храму, і має сім двокаплічок з выображіньом Крестной дорогы, є далшов вызначнов памятков Гуменного. Подля Ґрекокатолицького архієпіскопства в Пряшові є Калварія з 1941-го року з погляду ґрекокатолицькой традіції єдина свого тіпу в цілій архієпархії.

Памятков і дім угорьскых желізніць

В списку першых семох памяток є і дім на Станічній уліцу з кінця 19-го столітя, де урядовала інжінірьска дівізія Угорьскых кральовскых желізніць. Вынятковов памятков є про Гуменне і скулптура святого Йоана Непомука, ці наймолодша матеріална културна памятка, котров є Памятник вядкы присвяченый Червеній армії з року 1984.

До списку записали і 150-річный стром ґінко а Фолклорный колектів Калина, котрый быв основаный при Містьскім културнім центрі в році 1976. Тот почас свого існованя представив ся на многых подіях дома і в загранічу.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА