Індіферентне тихо

Іщі вечур перед тым єм бісідовав із приятельом, же Підкарпатя є безпечне, а окрем єдной заблудженой ракеты там нич не впало за цілу войну. 21-го авґуста, коли собі Чеська і Словацька републіка припоминають інвазію войск Варшавского договору, і наслідну окупацію Совітами, яка тырвала понад 20 років, ся сітуація дакус змінила.

Російскый аґресор атаковав Мукачово, кедь ракетами засягнув америцьку інівестіцію – фабрику. Подля послідніх інформацій є 19 зраненых. Є вопросом, ці такы атакы стануть теперь реґуларным режімом на Підкарпатю, або знова ішло о выняток, і тота область зістане і далше найбезпечнішов в рамках Україны.

Но уж теперь є ясне, же кедь даяка стриманость односно Підкарпатя з боку Москвы існовала, якбач уж не існує. Парадоксно по самітах америцького презідента із шефом Кремля, а пак із презідентом Україны і европскыма лідерами, де ся мало рішыти, як закінчіти войну.

Атака на Мукачово є з русиньского боку дакус інша. Ніт, не підцінюєме страсти людей в іншый областях Україны, в котрых мають атакы уж штоденный режім, но атака по нашій землі предсі лем дакус веце рушать із сердцьом. Што є про мене дакус немилым несподіваньом, она не рушать із сердцьом політіків держав, котры мають із тым реґіоном історічны звязы.

На Підкарпатю жыє велика мадярьска меншына, і в Мукачові творять Мадяры шумне проценто жытелів, а влада Віктора Орбана блокує приступовы переговоры Україны з Европсков унійов і вдяка непорішеным вопросам односно народностных прав. Лемже кедь Москва вдарить по тім реґіоні ракетами, якось тверды слова із мадярьской столиці не чути.

Віктор Орбан ку атаці не высловив ся нияк. Петер Сійярто, міністер загранічных діл, лем знова повторив, же треба чімскоріше закінчіти войну, а атака в Мукачові є того далшым доказом.

Сочувствіє выразив зраненым мадярьскый презідент Тамаш Шуйок. А пак змінив статус. Кедь в першій верзії писав о російскій ракетовій атаці, в позміненім статусі уж придавник „російскый“ выхабив.

Братя Чехы радо носталґічно споминають на републіку Масарика, котрой частьов была і теріторія Русинів, але днесь собі на то не спомянув нихто.

Окрім того, же має Мадярьско свою народностну меншыну на Підкарпатю, має з тым реґіоном і довгу – тісячлітню історію. Але в реакціях політіків то не видіти.

Братя Чехы радо носталґічно споминають на републіку Масарика, котрой частьов была і теріторія Русинів, але днесь собі на то не спомянув нихто із верьховных представителів. Ани презідент, ани председа влады, ани председа Сенату, ани предсидателька Посланецькой сеймовні – нихто з них не написав ани чарку о атаці на місто, котре з Прагов має історічне – державне капчаня. А то треба припомянути, же і Чехы мають на Підкарпатю свою меншыну. Невелику, але мають.

Но і од словацькых владных представителів бы єм, самособов, ани нич не чекав. Тоты єдины ня не скламали! Досправды не написали нич.

Од презідента через председу парламенту аж по председу влады – абсолутно нич. І то Роберт Фіцо хосновав Підкарпатя як місце стрічі, кедь хотів їднати з представителями Україны. Притім і Словаци там мають меншыну.

Інтересным є і то, же тихо суть жупаны Пряшівского і Кошыцького самосправного краю. Обидва реґіоны суть партнерьскыма реґіонами із Закарпатьсков областьов Україны. Файны партнеры.

Озвали ся ку темі пріматор Пряшова Франтішек Ольга, і віцепріматор Петро Крайяк. Пряшів є так само партнерьскым містом із Мукачовом.

Тото індіферентне тихо з боку мадярьскых, чеськых, словацькых політіків є досправды дачім, чому не порозумію. І кедь політіци на Словакії і в Чеській републіці мають днесь „купу роботы“ з припоминаньом інвазії, на Мукачово собі спомянути могли.

На другім боці є добрі знати, яка є реална сітуація, і з чім, наприклад і мы Русины, кебы пришла рішуча хвіля, можеме раховати. Тото тихо розбивать вшыткы ілузії.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.