Карпатьска писанка 2026 выставлює творы веце як 50-ох авторів

Вігорлатьскый музей в Гуменнім у співпраці із Окреснов орґанізаційов Унії жен Словакії і тот рік зорґанізовав вже 34-ый річник меджінародной конкурзной выставы під назвов Карпатьска писанка 2026.

До конкурзу, в котрім мож писанкы робити різныма, веце і менше познатыма техніками крашіня, од стародавных аж по тоты найновішы, і тот рік залучіли ся десяткы писанкарів.

Святочна вернісаж Карпатьской писанкы 2026 вєдно із выголошіньом резултатів конкурзу, в рамках котрого оціньовала писанкы меджінародна фахова жюрі, одбуде ся в Концертній салі Вігорлатьского музея в Гуменнім в четверь 5-го марца 2026-го року.

Як інформовав Вігорлатьскый музей, конкурзны колекції писанок од веце як 50-ох авторів із Словакії і заграніча будуть выставлены у Выставній салі Ореста Дубая, де їх буде мож видіти до 10-го апріля.

Музей тот рік приготовив почас тырваня выставы Карпатьска писанка 2026 і далшы супроводны події. Родины із дітми, але і вшыткы заінтересованы, мають можливость познакомити ся із творіньом писанок різныма техніками неділями пополідне на творчіх варштатах писанкарьства. Варштаты будуть 8-го, 15-го і 22-го марца.

Музей так само приготовлює і Ярмарок писанок, на котрім писанкарі із Словакії будуть свої писанкы заінтересованым продавати в просторах Вігорлатьского музея. Тота подія одбуде ся 29-го марца.