Карпатскій реґіон: етнолінґвістика і культуровы студиі – унікальный напрям студий на Ягайлоньскым Університеті

Кєд же знаны сут уж результаты матур, абсольвенты можут выберати дальшу пут вчыня. Як заявлят Філолоґічный Выділ Ягайлоньского Університету, урухомленый был набір на унікальный в скали цілой Польщы напрям студий – Карпатскій реґіон: етнолінґвістика і культуровы студиі.

В віторок 8. липця/юлия 2025 р. Центральна Еґзамінацийна Комісия подала результаты тогорічных матуральных еґзамінів. То тіж послідній момент, жебы зареґіструвати ся в електронным рекрутацийным системі першого набору студий на Ягайлоньскым Університеті – записы тырвают до 9. липця/юлия.

«То выняткова нагода, жебы зглубити таємниці Карпат і іх богаты культуры» – почуєме в реклямовым фільмі карпатскых студий.

Карпатскій реґіон: етнолінґвістика і культуровы студиі то єдины такы студиі в Польщы. Посвячены сут языкови i культурі єдного з важнійшых під ґеополітичным оглядом реґіонів Европы, якым сут Карпаты, котры обнимают терены Польщы, Украіны, Словациі і Румуніі.

Лекторат з лемківского языка

Студенты будут здобывати знаня з такых обшыри як: культурова антрополоґія, реліґійознавство ци етнолінґвістика. Обовязковы будут занятя з двох языків реґіону: украіньского і словацкого, буде мож тіж познати основы третього – до выбору: румуньского або лемківского.

В рамках ріжных предметів передане буде знаня о соспільній особливости реґіону, о спільных елементах карпатскых культур, а заєдно іх окремости. Не бракне проблематикы звязаной з нацийональныма, етнічныма і реліґійныма квестиями.

В проґрамі занять сут тіж тереновы практикы і баданя. «Більшіст тереновых досліджынь єст серед Лемків і Руснаків на Словациі» – рекомендує др габ. Олена Дуць-Файфер, членкыня професорской кадры того напряму.

Абсольвенты карпатского реґіону можут працувати в інституциях культуры і освіты, як напр. в музеях ци домах культуры. Цікавом опцийом може быти робота в медияльным секторі – в редакциях часописів, в радию ци телевізиі, як тіж в выдавництвах. Мож подумати о роботі в туристичній обшыри – студент кінчыт учельню зо знаємістю трьох языків.

Зголошыня в рекрутацийным системі мож зробити до 9. липця/юлия 2025 р. Оголошыня ранкінґового списку одбуде ся 18. липця/юлия, пак буде найпевнійше оголошеный другій набір – в тым примірі записы будут проходити в терміні до 11. вересня/септембра.