Книжка для діти о Лемковині нагороджена

Книжці Мариі Стшелецкой пн. «Бескід без кіту» была признана Нагорода ім. Фердинанда Вспанялого за найліпшу книжку для діти 2019 рока. Орґанізатором конкурсу є Краків Місто Літературы Юнеско. Книжку печатало Выдавництво Лібра.

Мария Стшелеска, артистка, творчыня анімаций, подорожничка, час-до-часу жытелька нашых гір, оповідат о бывшій і дншеній Лемковині. Єст авторком тексту та візуальной страны книжкы, котру мож сміло рекомендувати не лем молодшым чытачам. Публикация є літературно-плястичном історийом о земли Лемків, тій теперішній і тій сперед піл столітя, о єй таємницях, культурі, маґіі і природі.

Хоц книжка для діти, то принесе радіст і старшым

В поясніню капітулы пише ся, што «Бескід без кіту» в непересічный спосіб дозвалят однести ся до скомпликуваной польской спадковины, а в тым примірі польско-лемківской спадковины. Томаш З. Майковскій дополнят, што: «книжка порушаючо оповідат о тым, же чловек єст лем єдным з существ посеред неувірительно скомпликуваного світа природы – то нештоденна енцикльопедия».

Барбара Ґаврилюк, так само член капітулы, написала што: «Бескід без кіту» то книжка властиві без віку – книжка, при котрій дітина прекрасно проведе час, обзераючы несамовиты ілюстрациі зроблены авторком, котры навязуют до бывшых часів, до реалистичной ілюстрациі, яка обовязувала в часах Польской Народной Республикы. Книжка принесе тіж радіст дорослому чытачови. Велика кількіст знаня подана в лагідный спосіб».

В капітулі конкурсу засідают іщы Марта Ліпчыньска-Ґіль, пропаґаторка літературы для діти і молодежы, Йоанна Олех, писателька, ґрафічка, літерацка критичка, Шымон Кльоска – критик і літерацкій активіста та Лукаш Дембскій – прозаік, сценариста, автор книжок для діти.

Нагорода ім. Ф. Вспанялого передавана є вчас фіналовой ґалі Фестівалю Літературы дла Діти в Кракові.

«Дякую Низкому Бескідови (…), што трафлят ся мі гын тото, што найліпше»

Нагорода ім. Ф. Вспанялого для найліпшой книжкы для діти вручана є од 2016 рока. Єй цілю є промувати літературу і державных авторів і ілюстраторів. Тогорічна ґаля вручаня нагороды, з відомых причын, проходила онляйново. Присутна перед монітором Мария Стшелеска передала слова подякы для вшыткых, завдякы котрым повело ся печатати тоту публикацию. «Барз дякую жырі за доцініня мойой роботы (…), Ґражыні Ланґе, моій професорці з Працовні Ілюстрациі АКШ во Варшаві та Моніці Гануляк, дякую Выдавництву Лібра за тото, што увірили в тоту книжку (…) і барз ня підпорюют на каждым кроці звязаным з публикацийом і не лем» – вычысляла авторка.

Слова подякы М. Стшелецка направила і на Станіслава Криціньского, реґіоналисты, любителя гір, автора вельох краєзнавчых публикаций, тіж про Лемковину. «Дякую тіж Станіславови Криціньскому за несамовиты книжкы о Бескіді та за поміч в гляданю правды в істориі, а наконец дякую Низкому Бескідови за тото, што є безконечном інспірацийом, за тото, же ня принял як свою, і за тото, што трафлят ся мі гын тото, што найліпше» – закінчыла авторка.

На сайті выдавництва Libra PL мож в промоцийній ціні купити примірник книжкы, а до комплету мож придбати i календар на 2021 рік, в котрым поміщено ілюстрациі з публикациі.