Комлошка є «даньовым райом»

Село Комлошка в Боршодьско-абовско-зампліньскій жупі є історічным центром Русинів у днешнім Мадярьску. Русины ся ту датують од 18-го столітя. Діалект хоснованый в тій области став ся і основов при встановленю штандарду русиньского языка в Мадярьску. В Комлошці проходили і два літні таборы русиньской молодежы. Но Комлошка є і „даньовым райом“, котрый обявлює все веце домашніх і загранічных фірем.

Україньска редакція Euronews принесла недавно статю Беатріск Абот під назвов „Податковий рай по-угорськи, або як нащадки русинів гроші заробляли“. В статі ся пише, же Комлошка має днесь статус „екосела“, хоць в середині минулого столітя векшына жытелів, котре было русиньского походжіня, одышла до іншых реґіонів державы і село так майже заникло. У 90-тых роках 20-го столітя містна самосправа вырішыла, же зрушыть вшыткы фіремны поплаткы, кідьже в селі не было жадной фірмы і зістало в нім лем дакілько жытелів.

„Вырішыли сьме, же буде ліпше зрушыти фіремны дані містной самосправы, жебы допомочі людям робити бізніс і основати властны фірмы,“ пояснив про Euronews староста Комлошкы Ласло Котелеш.

Фінанчна кріза у 2008-ім році дотулила ся і Комлошкы. Село не мало жадны жрідла фінанцій. І так містна самосправа зачала рекламовати Комлошку як „даньовый рай“. Резултат? Веце як позітівный. Днесь має в Комлощці свої бюра веце як сто фірем, окрім іншого і шыфны фірмы із Голандії. Векшына в Комлошці зареґістрованых фірем суть міджінародны транспортны сполочности, котры у Комлошці не мусять платити містны дані.

Спокійны суть в Комлошці, в Будапешті, но і містны. Фіремны містны дані в Мадярьску представлюють 2 процента із профіту. „Наше фінанчне оберненя за рік представлює майже міліон евр, 2 процента, котры бы сьме з того мусили заплатити містній самосправі, можеме вернути до розвитку фірмы,“ говорить єден із подникателів в лоґістіці. Фірмы платять дані державі, значіть Будапешть не приходить о жадны фінанції з бізнісу в Комлошці. Навеце, в Мадярьску лоґістічны фірмы мусять платити шпеціалны дані із транспорту, із якых ся 40 процент вертать до реґіону, в котрім фірма діє. Так ся і Комлошці дістане грошей з бізнісу містных фірем.

Староста Котелеш підкреслює, же найвеце грошей із Комлошского бізнісу має держава, бо на їй рахунок ідуть дані, но містны фірмы єдночасно дали роботу веце як 3-ом тісячам людей. І так само містна самосправа, кідьже ся Комлошка розвивать, може вынакладати намагу, жебы здобыти дотації із Европской унії, што так само може помочі розвитку села.

Комлошка є доднесь принимана як історічный центер Русинів, но по русиньскы днесь в Мадярьску бісідує векшынов уж лем старша ґенерація. Асімілації з мадярьскым жытельством за допоміг на зачатку 20-го столітя выник Гайдудорозькой ґрекокатолицьцкой єпархії і окремого Апостольского екзархату у Мішковці, котры поступно перешли із церьковнославяньского на мадярьскый язык в богослужінях. Днесь існує в Мадярьску Мадярьска ґрекокатолицька метрополітна церьков.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА