Кошыці і Ужгород презентують сполочну дідовизну

Десять телевізных інсценацій, сполочны інсценації в театрі  і документы о інтересных локалітах суть резултатом словацько-україньского проєкту під назвов Подорожуючі лялькы (Cestujúce bábky).

Цільом проєкту было зліпшыти інформованость о Кошыцькім краї і Закарпатьскій области Україны і презентовати сполочну културну дідовизну. Інформовав о тім словацькый денник Korzár. Проєкт, до котрого были залучены і ляльковы театры в Кошыцях і Ужгороді, зачав іщі у 2015-ім році із підпоров Норвеґійского фінанчного механізма. В четверь, 6-го апріля 2017, мав своє завершіня міджінароднов конференційов в Кошыцях.

В рамках проєкту зробило ся десять телевізных інсценацій, з котрых пять є на словацькы і пять на мотівы із Підкарпатя. Як повів про денник директор Лялькового театру Кошыці Павел Грегорчак, суть то оповіданя, котры черьпали із леґенд і повістей перевязаных із конкретным місцьом в Кошыцькім краї або на Підкарпатю. Оповіданя, котры были оброблены приповідково про дітячу публіку, будуть одвысыланы іщі того року через Рождество в Словацькій телевізії.

Будуть із Спішского замку, рожнявской радніці, медзевского гамру, кошыцькой Урбановой вежы і віняньского замку. Із Підкарпатя буде мож видіти інсценації о чарівных гуслях, церькви, котра была збудована без єдиного клинця, о трьох сестрах на середняньскім замку, лампарьови із Ужгорода ці як выникли Карпаты.

Вєдно із інсценаціями будуть одвысыланы у верейноправній телевізії і телевізны документы презентуючі турістічны атракції на обидвох боках граніці. Закарпатьску область Україны і Кошыцькый край будуть презентовати і коміксы, котры выходять із філмовых приповідок. Коміксы ся будуть представльовати і в рамках чітательскых бісід а будуть дістрібуованы до бібліотек по цілій Словакії.

Далшов актівностьов в рамках проєкту є сполочна театрална інсценація Чудотворьный балон, в котрій найдеме вшыткы спомянуты оповіданя. Інсценація є в репертоарі Лялькового театру Кошыці і театру Бавка із Ужгорода, і вже почас минулорічной турістічной сезоны єй заграли в дакілько локалітах на обидвох боках граніці.

Цілковый розрахунок проєкту через Норвеґійскый фінанчный механізм быв коло 654 тісяч евр. Партнерами были окрім кошыцького лялькового театру і Кошыцькый самосправный край, Крайска орґанізація турістічного руху Кошыцькый край, Закарпатьскый академічный областный ляльковый театер Бавка і Асоціація штудентів – економів Закарпатя АСЕЗ.

Жрідло фотоґрафії: bdke.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА