Красна траса Velo Poprad готова

Мож уж хоснувати біциґльову трасу, што веде долином Попраду на західній Лемковині – зачынат ся в Креници, кінчыт в Старым Санчы. Єст частю проєкту Velo Małopolska.

«Velo Poprad то траса фурт менше знана як Velo Dunajec, хоц не менше красна. Іщы неє гын так вельо люди як на Velo Czorsztyn ци на Переломі Дунайця (медже Щавницьом а Червеным Кляштором), зато хто хоче захоплювати ся красом Бескідів і Попраду, мусит ся конечно тамадиль переіхати» – бесідує Ярослав Тараньскій з Velo Małopolska.

По дорозі вода з джерела

Траса має 60 км, веде долином Попраду – част по стежках з асфальту, одділеных од руху, част в пасі загального руху (низкє насиліня). Зробили єй в рамках проєкту Velo Małopolska і во спілпрацы ґмін Крениця, Пивнична, Мушына, Рытро, Старый Санч і з партнерами по словацкій страні.

Трасу мож легко переіхати протягом єдного дня, а з Кракова до Крениці доіхати сой потягом. Прогульку зачынат ся в Креници, де треба віхати на трасу Velo Krynica, што веде до Мушыны – іхат ся з горы, вздолж рікы.

«В Мушыні мож ся затримати в місци обслугы роверистів, жебы дыхнути, зазріти в мапу, напити ся мінеральной воды з єдного з чысленных джерел. Сут аж і специяльны біциґльовы пути, як Aquavelo ци Пут Мінеральной Воды, што ведут од єдного до другого джерела» – оповідат Тараньскій.

«Не треба заберати полных бідонів з хыжы, а лем дополняти по дорозі. Треба лем памятати, што мінеральна вода має особливый смак і ліпше попрібувати перед наполніньом цілого бідона» – додає.

Інвестициі в Пивничній

В Мушыні доіхат ся до Запопрадя, де ґміна вознесла цілу рекреацийну обшыр з басенами, ставами, сенсоричныма загородами. Як раз гын зачынат ся досправдовый одтинок EuroVelo11, веде він лісом.

Дале переіхати треба роверовый мосток Леґнава-Милик, котрым перекрачаме границю медже Лемковином а Пряшівском Русю, і іхаме окремым роверовым одтинком (медже ріком а желізницьом). Одтале черговым мостком зас вертаме на Словацию, конкретні до Малого Липника – іхаючы 19 км дорогами до старой граничной дорогы медже Мнишком над Попрадом а Пивничном.

Як раз Пивнична вельо заінвестувала в додатковы атракциі не лем для циклистів. На новых рекреацийных теренах сут новы роверовы і біговы стежкы, два асфальтовы памптракы і пішо-роверовый мосток над Попрадом.

Кєд ним переіхате, доберете ся до Рытра, пак уж Барціце, Циґановіце, де мож одпочати в вызначеных для роверистів місцях, і дале уж буде Старый Санч.

Velo Małopolska

Velo Małopolska то векшый проєкт реализуваный малопольскым воєвідством з середків Евросоюзу – доцільово буде чыслил 1000 км роверовых трас. Складат ся з осмох части, м.ін. Velo Dunajec, Velo Raba, Velo Rudawa, Velo Poprad. Лучыт найважнійшы міста реґіону, а тіж Малопольщу з інчыма воєвідствами.