Кроі малопольского села. Вєдно з томом о лемківскым облечыню – в бурсяній бібліотеці

Бібліотека Руской Бурсы в Ґорлицях збогатила ся о 10-томову колекцию выдавництва пн. «Краковякы, Ляхы, Ґуралі – облечыня малопольского села». Выдавцьом публикациі є Малопольскій Центр Культуры Сокіл в Новым Санчы, якій так само офірувал бурсяній бібліотеці цілу колекцию.

Серия «Краковякы, Ляхы, Ґуралі – облечыня малопольского села» вказує на красу, богатство і розмаітніст традицийных, святочных кроів та штоденного облечыня ґаздів, якє носили в малопольскых селах од Кракова по Закопане, од Завоі по Ґорлиці.

«На обшыри днешнього малопольского воєвідства давнійше істнувало без мала тридцет одмін сельского святочного облечыня парунадцетьох етноґрафічных ґруп, якы творили населіня реґіону» – подає Анджей Зарых, директор Малопольского Центру Культуры Сокіл. «Днес традицийны кроі знаны сут головні завдякы фольклористичным ансамблям. Часом носят іх вчас локальных торжеств. В світлі сучасных трендів, наслідком котрых облечыня фурт ся змінят, вказаня шыршого фону, як напряму і взірця, може мати першорядне значыня для плеканя традициі, а што за тым іде – захованя богатства облечыня бывшого малопольского села» – спостерігат дале А. Зарых.

10-томовый альбом є ефектом реализуваного Центром Культуры Сокіл вельолітнього дослідничо-документацийного проєкту пн. «Малопольща Джерелом Традициі» фінансуваного з европейскых фондів. На ціліст складают ся книгы про облечыня: Західніх Краковяків, Східніх Краковяків, Сандецкых Ляхів і Погірян, Лимановскых та Щыжыцкых Ляхів, Заґожаньскых та Кліщацкых Ґуралів, Бабіогірскых і Оравскых Ґуралів, Підгаляньскых і Охотницкых Ґуралів, Спишскых, Щавницкых та Пєніньскых Ґуралів, Сандецкых і Надпопрадскых Ґуралів. В 10. томі описано облечыня Сандецкых і Ґорлицкых Лемків та Шляхтівскых Русинів. Автором тексту є Юрий Стариньскій, він тіж згромадил неоцінену збірку архівальных і сучасных фотоґрафій, вказуючых лемківскы кроі, котры поміщено в альбомі. Веце о публикациі заявляли сме в тым дописі.

«Надієме ся, што гевсе выдавництво буде не лем документацийным і едукацийным материялом, але тіж споіньом, якє лучыло буде традицию і теперішніст, та формом промоциі реґіональной ріжнорідности парунадцетьох етноґрафічных ґруп Малопольщы, з котрых кажда є неповторна і выняткова» – заохочат директор. А Зарых.

Вшыткы томы доступны сут в чытельни бібліотекы Руской Бурсы.