Културны, історічны і освітні проєкты в словацько-польскім пригранічу

Польско-словацькы партнеры Пряшівского самосправного краю (ПСК) підписали контракты ку малым проєктам в Проґрамі Interreg. Як інформовало Одділіня комунікації ПСК, в плані, окрем іншого, суть фолклорны події, фестівалы, освітні актівности, котры скапчають жытелів словацько-польской граніці.

На теріторії Пряшівского краю іде о проєкты за веце як 650 тісяч евр, інформовала Даша Єленьова за ПСК. Довєдна было 24 успішных жадателів в II. вызві Фонду малых проєктів Проґраму черезгранічной співпраці PL-SK 2021 – 2027, котрый манажує Пряшівскый самосправный край.

26-го фебруара 2026-го року підписали контракты ку своїм проєктам, і можуть почати із реалізаційов. Заміряють ся в них на будованя співпраці меджі інштітуціями і жытелями приграніча, але і на безпеку, освіту ці на крізовый манажмент.

На теріторії ПСК проінвестує ся понад 650 тісяч евр із цілковой алокації, котра є 1,2 міліона евр із Европского фонду реґіоналного розвитку.

„Проєкты, котры сімболічно потвердили сьме підписаньом контрактів, суть тематічно барз розмаїты, і дотуляють ся вшыткых ґенерацій – ці то діти, молодеж, родины, сеніоры і фаховці із різных областей. Їх общім цільом є зліпшыти якость жывота в пригранічу, причім то не суть лем окремы актівности, але конкретны крокы ку тому, жебы реґіоны на польскім і словацькім боці граніці іщі веце приближыли ся,“ повів председа ПСК Мілан Маєрьскый.

Успішныма жадателями є конкретно 12 польскых інштітуцій, єднаке чісло словацькых. Но цілково є до проєктів залученых аж 50 партнерів із приграніча. На словацькім боці є то меджі іншыма і Стара Любовня, Снина, Бехерів, ці обчаньске здружіня Русинія. Проєкты буде реалізовати і сім орґанізацій, котрых зряджовательом є ПСК, меджі нима і Піддукляньскый освітній центер у Свіднику, котрый планує збудовати марку черезгранічной културы.

Вігорлатьска звіздарня в Гуменнім має реалізовати проєкт під назвов Одкрытый простор, в рамках котрого одбудуть ся умелецькы варштаты в Колоніцькім сідлі. Любовняньскый музей – град в Старій любовні, ся із своїм проєктовым партнером замірять на выробу научных і атрактівных філмів. В рамках схваленых проєктів рихтує ся і польско-словацькый фестівал.