Кус про Велию, кус про весіля, кус про ансамбль «Лемківщына» в Підзамочку – проґрам «70 процент» – субота, 21.00 год.

Днеска бесідуєме зас про лемківскы різдвяны, а кус і про весільны традициі. В якых формах могли Лемкы плекати свою культуру в місцях, де іх выселено? Як долго справляли весіля «по свому»? Ци спричынили ся даяк до утриманя языка і традициі лемківскы фольклорны ансамблі?

То уж остатня ― третя ― бесіда зо женамы з Підзамочка, села коло Бучача. Зато, як видите, они ту сідят і смотрят в будучніст. Знимка може і не барз новорічна, але символічна.

Сідяча найближе до нас ― то Дария Фуджак, котра має 68 років. Вродила ся по выгнаню на Радяньску Украіну, уж ту, в селі Підзамочок. Єй родиче походят з Котани і Мысцовы. За ньом ― Мария Зіньска, котрій восени ся сполнило 80 років, а пак Мария Пыж, о рік старша од давной свойой товаришкы. Они вродили ся в селі Ріпник коло Коросна.

Жыют ту медже своіма, бо в селі дост дуже Лемків, оддали ся тіж за Лемків. Брали участ в лемківскім фольклорным ансамбли (зліва видите Марию Пыж ― членку ансамблю).

То іщы Лемкы. Зберегли лемківскій язык, традициі і передали своім дітям. Але внукы, хоц шануют іх, переважні уж не чуют ся Лемками.

Три жены смотрят в будучніст ― яка она буде? Яка буде для них, для іх діти, для внуків?

…Але і мы вшыткы, коли стоіме на порозі Нового Рока, думаме о будучности, думаме про рік, же приходит. 2016 рік ― якым він буде для Лемків? А якым ― для нашого радия?

Щыро вірю, же він буде щестливым для Лем.ФМ, певна єм того, же поведе ся зреалізувати тото, што доднес было лем в плянах.

Для ня конец рока ― то добра нагода подякувати вшыткым людям, голосы якых звучали в «70%», вшыткым, што помагали найти респондентів, радили, хто зо вшыткых Лемків в Украіні найліпше ся надає до нашого радия. Хочу тіж подякувати шефови «Руской Бурсы» Павлови Малецкому за постійне сприяня і поміч, а тіж вшыткым, хто творит радийо Лем.ФМ. А особлива подяка належыт ся шефредакторови Демкови Трохановскому. Желам вшыткым ім щестя, здоровля, радости і многых-премногых літ!