Лемківскій Вертеп в Пшемкові – реляция з концерту – віторок, 20.10 год.

В неділю, 17. грудня/децембра Кружок Стоваришыня Лемків в Пшемкові зорґанізувал нову подію в рамках свойой культурной діяльности – І Лемківскій Вертеп.

Подія притягнула чысленну лемківску публику. Присутны были Пшемківяне, але тіж жытелі сусідніх місцевости. Серед запрошеных гости, окрем локальных самоурядовців, участ взяли нашы священникы – о. Ігор Попович з Пшемкова, о. Славомир Сороканич зо Студзьонок і о. Богдан Репела з Любіна.

Вчас такой двогодинного концерту запрезентували ся штырі групы. Як першый вказал ся хор «Нобіс» з Ліґниці, якій запрезентувал пару коляд в ріжных східньославяньскых языках. Дальше выступули ґаздове подіі – Лемківскій Ансамбль Пісні і Танця «Ластівочка», якій вчас концерту был зміцненый чысленныма діточками з «Ластівчат» – діточого колективу. Выступуючы, облечены в народны лемківскы кроі, представили найвеце автентичный лемківскій вертеп – пєсу о народжыню Ісуса Христа, збогачену народныма звыками, в тым чыслі і місцныма патріотичныма додатками – діти рецитували і співали о Лемковині.

Надале вказали ся «Ярошівяне» – музично-співоча група з Ярошівкы. То село, якє находит ся недалеко до Михалова – місцевости, в якій каждый рік Стоваришыня Лемків орґанізує Лемківску Ватру на Чужыні. «Ярошівяне» одпрезентували лемківскы коляды, але тіж коляды в другых східньославяньскых языках. При тым выспівали такы колядкы, якы записали од найстаршого поколіня – приміром была колядка зо Щавника.

На сам конец выступала «Файна Ферайна» – ансамбль з Вєхліц коло Шпротавы. Співакы при акомпаніяменті гудаків вказали лемківскы, украіньскы, польскы, анґлицкы і італияньскы коляды. Было медженародно, в ріжных языках світа.

В днешній реляциі почуєте тоту святочну атмосферу, яка буде нам товаришыла іщы через добрых пару тыжни.