Лемківскы орґанізациі внескуют о одкликаня Григория Куприяновича

Стоваришыня «Руска Бурса» в Ґорлицях та Стоваришыня Лемків передали до Міністра Внутрішніх Справ і Адміністрациі внесок о одкликаня Григория Куприяновича з функциі спілведучого Спільной Комісиі Уряду та Нацийональных і Етнічных Меншнын.

Орґанізациі вказуют на діяня представника украіньской меншыны, котры порушуют окреміст лемківской меншыны і правный порядок, котрый выникат з уставы о нацийональных і етнічных меншынах.

Як подали в писмі, головном причыном внеску сут публичны выповіди Григория Куприяновича, в котрых ідентифікує Лемків з украіньском нацийом і окрислят лемківскій язык як «діалект». Подля орґанізаций, того рода наррация то пробы ідеолоґічной асиміляциі, котры сут заказаны через обовязуючы переписы, а тіж квестийонуваня статусу лемківской меншыны як етнічной меншыны – офіцийні узнаной польском державом в 2005 році.

Лемківскій язык од років фунґує в ріжных обшырях штоденного і публичного жытя – «в штоденній комунікациі, едукациі (м.ін. через шкільне вчыня на каждым етапі едукациі – в тым на університетскым рівни), артистичній, літературній і сценічній, в медиях і журналистичній роботі, в соспільным, реліґійным і обрядовым жытю, а тіж в науковых баданях і передаваню правных інформаций“ – підкрислено в поясніню.

Орґанізациі обвиняют Куприяновича, же заміст стояти на стражы рівности і протидіяти дискримінациі – што єст єдном з уставовых задач Комісиі – хоснує свою функцию до промуваня поглядів, котры депрецийонуют окреміст Лемків.

Внескодавці высловлюют надію, што міністер підойме діяня, жебы «привернути довіря до Комісиі як форум діалоґу, а не нарядя асиміляциі».