Лемківскы лісы: порозумліня тыкаюче реприватизациі лісных ділянок

Як заявлят сайт rp.pl, в інформациі з дня 14. жолтня (октобра) т.р., Міністер Середовиска, передставникы Державных Лісів і деякє Стоваришыня Лемків підписали порозумліня, котре реґулює выдаваня приватным особам лісных нерухомости через Державны Лісы, положеных на земли перенятій в минулым Державным Скарбом з ражучым нарушыньом законів.

Сайт пише о тзв. лемківскых лісах, пояснюючы, же сут то нерухомости, котры жытелі полудньово – східньой Польщы (головні Лемкы), стратили в результаті выселінь в рамках Акциі Вісла в 1947 р.  Зазначат, же люди вывожено без выдаваня буд-якых адміністрацийных постанов.

Як припоминат смомемний уж сайт, Лемкы долгы рокы борют ся о зворот забраного ім беззаконні маєтку. Адміністрацийны суды вельо разів закінчували справы з позитывным рішыньом для лемківской соспільности. На жаль, Державны Лісы, хытро втікали од записів, выникаючых з судовых выроків.

Приведене на початку порозумліня остало підписане 12. жолтня (октобра) т.р. Як поінформувало Міністерство Середовиска, фінальні реґулює оно справы, звязаны з выдаваньом приватным особам лісных нерухомости.

Згідні з постановами підписаного порозумліня – Міністерство Середовиска має контролювати зворот лемківскых лісів. Своі підписы на документі зложыли підсекретар стану в Міністерстві Середовиска, заступця директора Державных лісів та – што цікаве – представникы Стоваришыня Лемків з Ґорлиц.

Оне зчудуваня, што до Стоваришыня Лемків, бере ся з того, же тота орґанізация не была сиґнатарийом жадного порозумліня. Потверджат тото єй предсідатель – Андрий Копча. З приведных інформаций додумуєме ся, же єдном зо стран підписаного порозумліня могло быти Объєднаня Лемків – украіньска орґанізация, зареґіструвана в Ґорлицях.

Польний зміст приведеной статіі чытайте за тым мотузком.