«Lemon Bucket Orchestra» концертує в Польщы

Канадийска фолькова ґрупа з Торонто – «Lemon Bucket Orkestra», в вересни даст своі концерты м.ін. в Польщы, што буде частю іх европейского турне.

10. вересня 2015 р. выступлят в Креници, але, як дознали сме ся од орґанізаторів концерту, імпреза, на котрій заграют, єст заперта і доступна лем для гостів з запрошынями. Другым концертом в Польщы буде выступ ансамблю во Вроцлаві, де заграют на 50 – літю Осередка Творчых Діянь Святовід. Она подія одбуде ся 27. вересня т.р., о 17.00 год. Вступне дармо.

Веце інформаций найдете на сайті ансамблю, як і на сайті ОТД Святовід. 

«Lemon Bucket Orkestra» в своім репертуарі має тіж лемківскы співанкы. Ґрупа была основана в 2010 р. в Торонто як уличний квартет, але днес мат дуже веце музыкантів з цілого світа, творячы культурово-етнічну мішанку. Своі інспірациі берут головні з мучычной традициі східньой Европы і Балканів.

Долов, найдена в сервісі YouTube, лемківска співанка Тому коса.