Лист од Заряду „Кычеры”

Інтернетовом дорогом пришол до нас лист од Заряду “Кычеры”. Публикуєме долов в ориґінальній писовни.

Витайте!

Пышеме пару слів про дотациі Міністерства Адміністрациі і Цыфрызациі на діяльніст народныx і етнічныx меншын в 2015 році. З приведеныx через Вас даныx незорієнтуваный чытач може однести вражыня, же “Кычера” взяла аж 44 процент вшыткыx дотациі, якы Міністерство признало лемківскым орґанізациям на діяльніст в 2015 році. Нажаль редакция Вашого Радия “забыла” додати, же з тыx 969 тисячы злотыx признаныx “Кычері”, аж 772 тисячы злотыx то дотация на ремонт будынку (xыжы „Кычеры”). На цілу діяльніст мерыторычну: проваджыня двоx ансамблів “Кычеры” і “Кычеркы” – разом праві 80 люди (тот проєкт обнімат тіж едукацийны варштаты для діти і молодежы на Лемковині); орґанізацию Міжнародного Фестівалю “Сьвіт під “Кычером”, проваджыня бібльйотекы, діяльніст выдавничу, проваджыня роботы арxівально-етноґрафічной, проваджыня біжучой діяльности (книговод, медия, прядкы і інче), “Кычера” отримала вшыткого 197 тисячы злотыx. Кед порівняти то з дотациями для інчыx орґанізациі, вкаже ся, же найвеце отримала Руска Бурса, далe Обєднання Лемків, Лемко Товер і аж “Кычера”. Може треба тіж припомнути, же “Кычера” о грошы на ремонт старала ся долгы рокы, а достала іx аж тепер. Скорше інвестицийны дотациі отримали праві вшыткы значучы лемківскы орґанізациі: Обєднання Лемків, Руска Бурса, Музей в Зиндрановій, Лемко Товер і Стоваришыня Лемків. Певно повісте чом аж тівко? Одповідаме – лем тівко! Наша “xыжа” то простір аж 1200 квадратныx метрів. Будынок має веце як 100 років і николи не был ремонтуваний; не є в ньому огріваня, зато – ґріб і вільгіт, протікаючий даx, надпалены і прогнілы крокви. В такыx умоваx ведеме пробы, тримаме наше облечыня (строі), інструменты музычны, музейны експонаты, арxівальны документы i книжкы (може інтересно Вам знати, же наша лемківска бібльйотека раxує праві 10 тисячы волюмінів). Ґенералний ремонт будынку експерты выцінили на … 3,5 мілийона злотыx. Тогорічна дотация дозволит нам лем поміняти загорожений заваліньом даx, замонтувати огріваня та може дакус поправити санітарну сіт. Вшытко!

Здравиме.

Заряд “Кычеры”