Ювілейна літургія, першыраз в середині новобудуваной церкви на Святій Горі Явір

Тогорічне свято Рождества Пресвятой Богородиці для вірных православной перемышльско-ґорлицкой єпархіі запише ся до істориі як дальша важна дата.

По перше зато, што як раз рівно 100 років тому Богородиця обявила ся на горі Явір – в місци, в котрым тепер тырват будова другой святыні – православной. Тогорічный праздник (21. вересня/септембра) вышол на неділю.

Молитва была выняткова тіж зато, што хоц будова фурт іде, то в середині церкви была в тот ден одслужена перша Божеска Літургія, яку очелил владыка Паісий, архієпископ перемышльско-ґорлицкій. Владыці спілслужыли парох Ганчовы, о. Володислав Канюк, о. Петро Пупчык з Крениці, о. Ярослав Ґрич в Ґладышова і Ждыні та монах Максим, ігумен высівского монастыря. Співал хор під дириґентуром Анны Дылонґ.

Під час богослужыня возносили ся молитвы за вшыткых жертводавців і будівничых новой церкви.

На закінчыня владыка Паісий приближыл історию свята, але тіж іщы раз припомнул важны ювілеі – 1700 років од І Вселеньского Собору і 100 років од явліня Богородиці нашому народови.

Владыка навязал тіж до подій остатніх дни – канонізациі православных катыньскых мучеників. Припомнул, што двох з них походило з обшыри перемышльской єпархіі. Архієрей дякувал жертводавцям, підкрисляючы, што новобудувана святыня буде памятником не лем 100-літя явліня Богородиці, але так само припоминала буде 100. річницю поворотів Лемків до православя, што на більшу міру зачало ся в 1926 р.

При кінци слово мал о. Володислав Канюк, якій в імени духовенства і вірных подякувал владыці за будову церкви.

фот. orthodox.pl