Любовняньскый музей має за собов успішне літо. Місто дістало ся до Forbes

Літні вакації оцінюють на Любовняньскім граді барз позітівно. Як потвердив про аґентуру TASR директор Любовняньского музея Далібор Микулик, за місяці юл і авґуст евідують приблизно чотырипроцентове нароснутя чісла навщівників.

За першых вісем місяців 2025-го року пришло на град і до сканзену, де суть і обєкты з русиньслых сел, приблизно 187 тісяч турістів, что є докінця о вісем процент веце як в попереднім році.

„Беру то за великый успіх, кедже реґіструю великы знижіня навщівности в нашім реґіоні і реґіонах околіці. Окрем того, же град безперерывно обновлюєме, і презентуєме дома і в загранічу, сприступнюєме все штось нове, зато то приписую головно музейникам і людям, котры приготовили богатый проґрам, незвычайны експозіції і новы выставы,“ повів про аґентуру Микулик.

За словами директора нич ся не мінить на тім, же найвеце турістів приходить із Словакії, за нима суть турісты з Польщі, пак із Чеськой републікы а Мадярьска.

Микулик думать, же покля бы была на Словакії ліпша інфраштруктура, заевідовали бы нароснутя навщівників так само з іншых держав. „Я сам навщівив дакілько велеторгів турістічного руху, є інтерес із країн як Іспанія і Франція, але бракує транспорт до нас, ці по землі або у воздусі,“ підкреслив.

Град буде одкрытый і почас осени, а Любовняньскый музей на нім рихтує веце далшых інтересных подій.

„Помалы рихтуєме і богатый рождественный проґрам, а думаме на рік 2026, коли музей буде святковати 70 років свого існованя,“ повів директор з тым, же рихтують в слідуючім році і нову воєньску експозіцію, а так само якраз теперь рішають колавдацію северовыходной стіны граду.

Стара Любовня може похвалити ся нелем успішным літом на граді, але і тым, же місто ся знайшло в америцькім выданю часопису Forbes. Редакція того часопису выбрала єденадцять найкраснішых малых місточок в Европі.

„Місточко Стара Любовня, котрого історія сягать аж до року 1292, вабить турістів міксом історії, културы і природы,“ написав Forbes  з тым, же далше описав події, котры шторік одбывають ся на „імпозантнім Граді Любовня“.

Фото: FB/Ľubovnianske múzeum.