Малопольскє Воєвідство передало 4 млн зл на охорону памятників, тіж тых з Лемковины

При дофінансуваню Малопольского Воєвідства девятдесят двом підметам поведе ся провести консерваторскы, ремонтовы ци інчы реновацийны роботы при обєктах, котрыма заряджают, што вписаны сут в державный реґістер памятників. Сто вісем інчых оферт одшмарили.

В понедільок 27. лютого/фебруара Соймик Малопольского Воєвідства піднял схваліня в справі уділіня дотаций на консерваторскы, реставраторскы або будовляны роботы при обєктах вписаных до реґістру памятників, што находят ся на обшыри малопольского воєвідства, і тым самым передал результаты черговой едициі конкурсу пн. «Охорона памятників Малопольщы».

Серед выріжненых в конкурсі нашли ся м.ін. такы обєкты з плянуваныма роботами:
– консервация малярскых декораций на скліпліню і стінах олтаря грекокатолицкой церкви Народжыня Пресвятой Богородиці в Розділю (40 тис. зл);
– консервация ікон: Покров Божой Матери та свв. Космы і Даміяна з XVII/XVIII ст. в православній церкви Покровы Божой Матери в Волівци (30 тис. зл);
– консервация двох бічных олтарів в бывшій грекокатолицкій церкви Михала Архангела в Верхомли Великій (30 тис. зл);
– ізоляция і одводніня фундаментів бывшой грекокатолицкой церкви Михала Архангела в Жеґєстові (20 тис. зл);
– полна консервация іконы з XVII ст. «Хрещыня Ісуса Христа» в бывшій грекокатолицкій церкви Покровы Божой Матери в Матієвій (15 тис. зл);
– ремонт ґонтового огороджыня довкола бывшой грекокатолицкой церкви св. Йоана Златоустого в Явірках (24 тис. зл).

Внескодавцями выже выміненых, окрем церкви в Розділю і Волівци, были римокатолицкы парохіі.

«Признаня дотаций з буджету малопольского воєвідства в одповіди на внескы властителів памятників позволит провести вельо консерваторскых, реставраторскых або будовляных робіт, котры охоронят перед знищыньом вельо цінных творів муруваной і деревяной архітектуры, стінны поліхроміі, різбы, образы і артистичне ремесло. Опіка над ресурсами реґіональной культуровой спадковины єст задачом самоуряду воєвідства» – чытаме в поясніню схваліня.

Потребы сут великы

Посеред одшмареных Малопольскым Воєвідством оферт (108) нашло ся парунадцет зрыхтуваных православныма і грекокатолицкыма парохіями – опікунами лемківскых храмів. Не отримали дофінансуваня на ремонты і консервацию м.ін. парохіі в Новици, Кунковій, Ліщынях, Ганчовій, Устю Рускым, Снітници, Бортным, Высовій ци Креници. На роботы при лемківскых храмах не отримали тіж римокатолицкы парохіі, што заряждают памятковыма церквами в Мухначці Нижній, Перунці, Полянах, Дубным, Бересті, Зубрику, Лабовій, Білцаревій, Квятони і Рыхвалді.

Тринадцет дальшых підметів одшмарили з формальных блудів, што лем доказує, як великы потребы в обшыри консервациі памятників сут на обшыри Малопольского Воєвідства.

В тогорічній едициі конкурсу до дня 15. грудня/децембра 2022 р. зложеных было разом 213 внесків в загальній очекуваній квоті дотациі высокости праві 25,8 млн зл. Малопольскє Воєвідство перезначыло в сумі 4 млн зл на проґрам «Охорона памятників Малопольщы».

В рамках того конкурсу самоуряд воєвідства може признати дотациі каждому властительови памятникового обєкту – єдиницьом самоуряду, позаурядовым орґанізациям, костельным підметам, аж і приватным особам.